Astanada surǵylt ári birqalypty úılerdiń qurylysy josparda joq
ASTANA. QazAqparat - Astana qalasy Sáýlet jáne qala qurylysy basqarmasy ókilderi qalanyń damýy baǵyty jaıynda aıtyp berdi, dep habarlaıdy QazAqparat.
Basqarma málimetinshe, bıyl elordada 2 mıllıon 200 myń sharshy metr baspana salynada.
«Biz qalany tegis bes jáne toǵyz qabatty kóp páterli úılerdiń qurylysymen josparlap otyrǵanymyz joq. Osy oraıda salynatyn baspana átúrli úlgide turǵyzylady. Biryńǵaı surǵylt nemese birqalypty deńgeıdegi yqsham aýdandar bizde josparlanbaǵan. Bas jospardyń ustanymy boıynsha erekshe bólip, soǵan ǵana ekpin qoıatyndaı biryńǵaı ortalyq eskerilmegen. Bizdiń aıtarlyqtaı jazyq jer bederinde osyndaı ortalyqtar kóp. Negizgi maqsat - olardy erekshelep kórsetý», - dedi basqarma basshysy Baqtybaı Taıtalıev Ortalyq kommýnıkatsııalar qyzmetindegi baspasóz máslıhatynda.
Onyń sózine qaraǵanda, qurylys nysandary bıiktigi ortalyqtan shetki aýmaqtarǵa qaraı tómendeı beredi. Qalaǵa kiretin jeti magıstral boıyna qurylys nysandary qarastyrylǵan. Aldaǵy jyldary qala jan-jaqty baǵyttarda damıtyn bolady. Osy oraıda negizgi baǵyttar retinde shyǵys, ońtústik jáne batys bóligi, sondaı-aq qalanyń ishindegi qaıta salynatyn qurylystar qamtylmaq.
«Shyǵys baǵytta - «Myńjyldyq alleıasy», ıaǵnı «Qazaq Eli» alańynan jańa temir jol vokzalyna qaraı aýmaq eskerilgen. Bul óz kezeginde óte úlken aýmaq, 800 gektardy quraıdy. Bizdiń oıymyzsha, osy jerde shamamen 80 myń adamǵa arnalǵan baspana, qyzmet kórsetý nysandary turǵyzylady. Ońtústik baǵytqa toqtalsaq, Máńgilik El, Qabanbaı batyr, Turan dańǵyldary boıymen qurylys salý kózdelgen. Ol aýmaqta «EKSPO» kórmesiniń keńistigi ornalasqan. Atap aıtqanda, osy jer qalanyń úshinshi jańa ortalyǵy», - dedi basqarma basshysy.
Munymen qosa ol qala ishinde de qurylys jumystary júrip jatqanyn, aldaǵy ýaqytta bul jerlerde jańa nysandar, mektepter jáne bala baqshalar paıda bolatynyn jetkizdi.
