Astanada sýretshi Jeńis Kákenulynyń «Sáıgúlik semantıkasy - 4» atty jeke kórmesi ashylady
ASTANA. QazAqparat - 7 aqpan kúni saǵat 17.00-de QR Tuńǵysh Prezıdentiniń Mýzeıinde tanymal sýretshi, QR Sýretshiler Odaǵynyń múshesi, pýblıtsıst Jeńis Kákenulynyń «Sáıgúlik semantıkasy - 4» atty jeke kórmesi ashylady. Bul týraly astana.kz saıtyna mýzeıden habarlady.
Ekspozıtsııanyń ortalyq personajy erkin júırik sáıgúlik, qaıyrymdy serik pen dostyń beınesi. Bul taqyrypqa avtor birneshe eńbegin arnaǵan. Jylqy jylynda ashylatyn kórmege osy serııadaǵy 50 týyndy qoıylǵan.
Jeńis Kákenuly 1965 jyly 9 mamyrda Almaty oblysy, Qarabulaq aýylynda týǵan. Balalyq shaǵynan keskindemeni súıip unatqan. 1989 jyly Qazaq pedagogıka ınstıtýtynyń kórkem-grafıka fakýltetin bitirdi. «Aqjelken», «Zerde», «Mádenıet», «Týra Bı» jýrnaldarynda sýretshi jáne kórkem redaktor bolyp jumys istegen. Qazirgi ýaqytta «Folıant» kitap baspasynyń sýretshisi, sýretshi-synshy, kitap ıllıýstratory, ár túrli emblemalardyń avtory. Sýretshi Mádenıetti qoldaý jyly emblemasynyń avtory (2000 j.), 2009, 2010 jj. Prezıdent stıpendııasynyń laýreaty. Onyń sýretteri Qazaqstan, Reseı, Moldova jáne Túrkııadaǵy jeke kollektsııalarda saqtaýly.
2013 jyldyń mamyrynda Qazirgi zaman óneri murajaıynda (Astana q.) «Aq zer» kitabynyń tusaýkeseri ótti. Bul - avtordyń qazaqstandyq jáne álemdik sýret ónerine arnalǵan ónertanýshylyq maqalalarynyń jınaǵy.
