Astanada sýretshi Januzaq Músápirdiń jeke kórmesi ashylady
TANA. 25 qazan. QazAqparat - 26 qazanda QR Prezıdenttik mádenıet ortalyǵynyń «Qasıet» zalynda belgili sýretshi, rejısser, telejýrnalıst, QR Kórkemsýret Akademııasynyń múshe korrespondenti Januzaq Músápirdiń jeke kórmesi ashylady, dep habarlady ortalyqtyń baspasóz qyzmeti.
Januzaq Kerimbekuly Músápir 1961 jyly 26 qazanda Almaty oblysy Balqash aýdany Aqkól aýylynda dúnıege kelgen. 1979-1984 jyldary Qazaqtyń Abaı atyndaǵy pedagogıkalyq ınstıtýtynyń kórkemsýret fakýltetin bitirgen.
1991-1993 jyldar aralyǵynda T. Júrgenov atyndaǵy óner ınstıtýtynda oqytýshy jáne «Qazaqfılm» kınostýdııasynda sýretshi-rejısser bolyp jumys isteıdi. 1995 jyldan «Rahat» telearnasynda redaktorlyq qyzmetke aýysady. 1998-2001 jyldar osy telearnanyń Bas redaktory, al 2001 jyldan 2007 jylǵa deıin «Rahat» telearnasynyń qazaq tildi baǵdarlamalar Dırektsııasynyń Dırektory qyzmetin atqara júrip, ol túrli ekonomıkalyq-áleýmettik taqyryptardy qozǵady.
2007-2009 jyldary «Habar» agenttigi Aqparattyq baǵdarlamalar Dırektsııasy Dırektorynyń orynbasary bolyp istegen Januzaq Kerimbekuly halqymyzdyń ulttyq bolmysy men mádenıetin órkendetýge ózindik úles qosyp, úlken shyǵarmashylyq úrdiste qalamyn ushtaǵan óz isiniń maıtalmany.
Elimizdegi birneshe telearnalarda elge tanymal bolǵan súbeli habarlar jasap, qazaq teledıdarynyń órkendeýine aıtarlyqtaı úles qosty. «Rahat» telearnasyndaǵy «Oıtolqyn», «El múddesi» jáne «Іnjý marjan», «Habar» arnasyndaǵy tikeleı efırdegi «Kózqaras» baǵdarlamalary arqyly qazaq halqynyń zııaly qaýymy, aqyn-jazýshylar, óner, mádenıet qaıratkerleriniń shyǵarmashylyǵy men ǵumyrnamasy týraly tereńnen tartqan habarlary el rýhanııatyna mol úles qosty. Arǵy tarıhtaǵy Qurmanǵazy, Dına, Mahambet, Abaı, Shákárim, Jambyl týraly túsirilgen shoqtyǵy bıik dúnıeler óz kórermenin taba bildi.
Mahambettiń týǵanyna 200 jyl tolý qurmetine arnaıy túsirilgen 8 derekti fılminen óz isiniń kánigi sheberiniń qoltańbasyn kórýge bolady. Qazaqtyń belgili kúıshisi Qarshyǵa Ahmedıarovpen birge shyǵarmashylyq izdenisten týǵan fılmder «Mahambet» atyndaǵy syılyqpen marapattaldy.
Búginde Januzaq Kerimbekuly Músápir «Qazaqstan» RTRK» AQ Aqparattyq-saraptamalyq baǵdarlamalar Dırektsııasynyń dırektory retinde Táýelsiz Qazaqstanymyzdyń saıası-ekonomıkalyq, qoǵamdyq, áleýmettik, mádenı ómirinde bolyp jatqan oqıǵalardy kópshilikke jetkizý jolynda abyroımen eńbek etip keledi. Onyń sýretshilik qyry da uzaq jyldar boıy ónersúıer qaýym men kásibı ortada joǵarǵy baǵaǵa ıe bolyp keledi. Januzaq Kerimbekulynyń beıneleý ónerindegi barlyq janrlarda terbegen týyndylary 100 den asady.
Onyń eńbekteri memleket tarapynan laıyqty baǵalanyp QR «Mádenıet qaıratkeri» belgisimen marapattaldy.
Kórmege «Ákem», «Dastarhan natıýrmorty», «Han Táńiri», «Balyqshy», «Kókpar», «Qobyz saryny» t.b. jumystary qoıylady.
Kórme 31 qazanǵa deıin jalǵasady.
