Astanada sýretshi Sáýle Dúısembınanyń jeke kórmesi ashyldy

Ekspozıtsııaǵa sýretshiniń 40-tan astam týyndysy qoıylyp otyr. Onyń ishinde 25 kollaj ben 20 kórkemsýret kartınalary usynylǵan.

Bul Sáýle Dúısembınanyń Astanadaǵy alǵashqy jeke kórmesi. Bunyń aldynda onyń jumystary Almaty qalasynda 4 ret jáne Italııanyń Neapol qalasynda qoıylǵan bolatyn.

Onyń kollajdarynda XIX ǵasyrda túsirilgen eski fotosýretter, qaǵaz qoraptardyń bólikteri, álemdik sán úlgileriniń leıbldary men brendteri kezdesedi.  Sol arqyly ol búgingi kún men ótken tarıhty baılanystyrǵysy keletin sııaqty. Buny óner ıesiniń ózi de jasyrmaıdy.

«Fotosýretter Sankt-Peterbor kýnstkamerasynan alynǵan, Reseıde sol zamandarda ómir súrgen Dýdın degen fotosýretshi bolǵan. Osyndaǵy týyndylar sonyń eńbekteri. Fotosýret kollajdaryn jasaýmen 11 jasymnan beri aınalysyp kelemin. Álemde osy stılde, osy baǵytta jumys jasaıtyn sýretshiler kóp emes. Eski sýretterge álemdik sán brendterin qosý arqyly men olardy búgingi zamandaǵy ýaqytpen baılanystyrǵym keledi», - deıdi ol.

Sáýle Dúısembına 1971 jyly 4 sáýirde Qaraǵandy qalasynda týǵan. 1990 jyly N.V.Gogol atyndaǵy Almaty kórkemóner ýchılışesin támamdady. 1997 jyly Almatydaǵy Qazaqstannyń memlekettik kórkemóner akademııasyn bitirdi. Qazaqstan Sýretshiler odaǵynyń múshesi. Onyń jumystary Qazaqstan, AQSh, Anglııa, Frantsııa jáne Italııa elderinde jeke kollektsııalarda saqtaýly.