Astanada sýretshi L.Janpeıisovanyń jeke kórmesi ashyldy

Onyń ashylý saltanatyna senatorlar Svetlana Jalmaǵambetova, Vladımır Redkokashın, Reseı Federatsııasynyń Qazaqstandaǵy Tótenshe jáne Ókiletti elshisi Mıhaıl Bocharnıkov, ónertanýshylar men sýretshiler, qala turǵyndary qatysty.

Larısa Janpeıisovanyń tereń maǵynaly sýretteri astanalyq ónersúıer qaýymǵa burynnan tanys jáne olardyń júregin baıaǵyda-aq jaýlap úlgergen. Al onyń shyǵarmashylyǵy qala qonaqtarynyń nazaryn aýdaryp, ár kezde de ishteı baýrap alyp otyrady. Alaıda atalmysh ekspozıtsııa - sýretshiniń mansabynda bolǵan kórmelerdiń ishinde tek ekinshi jeke kórmesi. Óıtkeni keskindeme ónerin qadirleýshiler daryndy ustanyń jumystaryn boıaýy keppeı jatyp sheberhanadan satyp alady. Sondyqtan Larısa Janpeıisovanyń sýretin keıde jınaý qıyn. Bar gáp osynda jatyr.

Mamandyǵy sáýletshi bola tura, L. Janpeıisova keskindeme salasyndaǵy jumystaryn qosa atqaryp júrdi. 1982 jyly ol qalanyń sýretshiler odaǵyna múshelikke ótti. Al 1992 jyly Qazaqstan sýretshiler odaǵynyń múshesi boldy. 1995 jyly onyń týyndylary Kembrıdj jáne London qalalaryndaǵy kórmelerge qoıyldy. Sol jyly ol Abaı atyndaǵy halyqaralyq klýbtyń «Qazaqstan daryndary» atty stıpendııasyna ıe boldy. L. Janpeıisovanyń «Bizdiń prezıdent» atty sýreti halyqaralyq qaýymdastyqtyń bıik baǵasyn aldy jáne ol matanyń reprodýktsııasy 2000 jyly Londonda shyǵarylǵan «Nursultan Nazarbaev» atty kitapqa kirdi.

Taǵdyry qıyn sýretshi árdaıym úısiz-kúısiz balalardy qostaýǵa daıyn. Ol «Bóbek», «Aq bota» jáne «SOS-Kınderdorf» balalar úıine kómek kórsetip keledi, al 2000 jyldan beri «Svetoch» jetim balalar úıin óz qamqorlyǵyna alǵan. Sýretshi atalmysh kórmeden túsken qarajatty bıyl da qamkóńil balǵyndarǵa aýdarmaq.