Astanada sýretshi Qazaqbaı Ájibekulynyń «Asyl arman» atty jeke kórmesi ashylady

Kórme murajaıdyń seriktestik jobasy aıasynda uıymdastyrylyp otyr, dep habarlady osy mádenıet ordasynyń baspasóz qyzmeti. .

Osy óńirde týyp-ósken sýretshini onyń kóz aldynda bolyp jatqan orasan zor ózgerister beı-jaı qaldyrmaıdy. Kóne zaman men qazirgi turmystyń beınelerin somdaı otyryp, ol óz týyndylarynan dástúrlerdiń myzǵymastyǵyn, dala danalyǵynyń, ómirge shynaıy qushtarlyq pen uly armannyń kózge iliner aıǵaqtaryn izdeıdi. Ol Uly Dalanyń eńbeksúıgish halqyna jarqyn ómir men baqyt syılaıtyn armandy ańsady. Mundaı aıǵaqtardy sýretshi qorshaǵan ortadan, óziniń ishki jan dúnıesin qalyptastyratyn nárselerden tabady. Osyǵan baılanysty uıymdastyrýshylar kórmeniń basty maǵynalyq jáne kórkemdik túıinin dáýirler toǵysynda dúnıege kelgen Armandy iske asyrýshy - jańa Kóshbasshy, jańa qoǵam, jańa Qazaqstannyń jarqyn beınesin anaǵurlym ashyp kórsetetin «Astana tańy» keskindemesinen tabady. Kórme ekspozıtsııasynda avtordyń shyǵarmashylyq damýynyń ár kezeńinde onyń ataqty «etnoromantıkalyq stılin» pash etetin Tuńǵysh Prezıdent murajaıynyń kollektsııasyndaǵy jumystary men ár jyldary dúnıege kelgen keskindemeleri de dál osy týyndynyń mańynda júıeli túrde óz ornyn tapty.

Onyń shyǵarmashylyǵynyń basty taqyryby tarıhı mura, uly tulǵalar men uly oqıǵalardyń beınesi, mysaly, QR Tuńǵysh Prezıdenti murajaıynyń kollektsııasyndaǵy «Jeti jarǵy» (2003 j.) monýmentaldy jumysy.

Ónertanýshy N.Ivanına Q. Ájibekulynyń qaıtalanbas shyǵarmashylyq qoltańbasyn «etnoromantıkalyq» stıl dep sıpattaıdy. Shynymen de, sýretshiniń týyndylary Uly dalanyń rýhymen úndestikke shaqyratyn sezim qaldyrady. Sýretshiniń shyǵarmashylyq izdenisteri, oryndaý máneri jaıly onyń alǵashqy jumystaryn sońǵylarymen salystyra otyryp kórýge bolady. Shyǵarmashylyq jolyndaǵy alǵashqy týyndylarynyń qatarynda «Altyn Dala» (1996 j.), «Qyz Jibek» (1997 j.), «Saryarqa kóshi» (1997 j.), «Kóshpendiler» (1997 j.) polotnolaryn ataýǵa bolady.

Ol Álibaı Bapanov pen Kenjebaı Dúısembaevtyń shákirti, 1986 jyldan bastap respýblıkalyq, búkilodaqtyq jáne halyqaralyq kórmelerge qatysyp keledi. Qazirgi tańda Q.Ájibekuly ózindik qoltańbasy bar avtor, Qazaqstan sýretshiler Odaǵynyń múshesi, kóptegen júldelerdiń laýreaty, sonyń qatarynda Á. Qasteev atyndaǵy arnaıy syılyqtyń (1999 j.), QR Úkimetiniń «Daryn» memlekettik jastar syılyǵynyń ıegeri (2001 j.). «Astana-Báıterek», «Astananyń gúldenýi - Qazaqstannyń gúldenýi» syndy kóptegen baıqaýlardyń jeńimpazy, QR Prezıdenti stıpendııasynyń (2009 j.) jáne Memlekettik stıpendııanyń (2010 j.) laýreaty. 2012 jyly Q. Ájibekuly «Qazaq halyq eposy. Qazaq halqynyń tarıhy men salt-dástúrleri» respýblıkalyq baıqaýynyń jeńimpazy atanyp, óziniń shyǵarmashylyq ustanymdaryna degen adaldyǵyn taǵy bir márte dáleldedi.