Astanada sýretshi Á. Ysmaıylovtyń týǵanyna 100 jyl tolýyna arnalǵan Halyqaralyq konferentsııa bastaldy
QR Mádenıet jáne aqparat mınıstrligi Mádenıet komıtetiniń tóraǵasy Tileýǵalı Qyshqashbaev atap kórsetkendeı, búginde Áýbákir Ysmaıylov syndy qazaq halqynyń belgili tulǵalaryn ulyqtap, keıingi urpaqqa jetkizý - mańyzdy mindetterdiń biri. «21 ǵasyrda ata-babalarymyzdyń jolyn jalǵastyryp, Qazaqstannyń atyn shyǵaratyn talaı azamattar bolady. Alaıda biz buǵan deıin halqymyzdyń ulttyq óneri men mádenıetine óz úlesin qosyp ketken tulǵalardy esh umytpaýymyz qajet», - deıdi T. Qyshqashbaev.
Konferentsııa aıasynda Á.Ysmaıylovtyń týǵanyna 100 jyl tolýyna arnalǵan «Álem kóshpendi boıaýynda» atty kórme de ashylady. Onda qylqalam sheberiniń 1930-1990 jyldary dúnıege ákelgen 100-ge jýyq keskindemelik jáne grafıkalyq týyndylary usynylady. QR Mádenıet jáne aqparat mınıstrligi Aqparat jáne muraǵat komıtetiniń tóraǵasy Bolat Kalıanbekovtiń aıtýynsha, Qazaqstannyń halyq sýretshisi Áýbákir Ysmaıylovtyń týǵanyna 100 jyl tolýyna oraı, QR Mádenıet jáne aqparat mınıstrligi úsh tilde (qazaq, orys, aǵylshyn) «Álem kóshpendi boıaýynda» atty kitap-albomyn jarııalaıtyn bolady. Sonymen qatar mınıstrlik sýretshiniń týǵan-týystarynyń estelikteri negizinde derekti fılm túsirýdi qolǵa alýda. Oǵan reseılik mamandar da tartylatyn bolady. Áýbákir Ysmaıylov - QR mádenıet qaıratkeri, ár jyldary Eńbek Qyzyl Tý, Qurmet belgisi ordenderimen marapattalǵan, Qazaq KSR Eńbek sińirgen óner qaıratkeri, Qazaq KSR Halyq sýretshisi ataǵyn ıelengen. Onyń baı murasy búgingi tańda qazaq beıneleý óneriniń altyn qorynan laıyqty ornyn alyp otyr. Has sheberdiń keskindemelik jáne grafıkalyq týyndylary óziniń oryndalý sheberligimen, taqyryby men sıýjetiniń sheksiz alýandyǵymen, boıaýynyń baılyǵymen jáne obrazdarynyń fılosofııalyq kóterińkiligimen tańǵaldyrady.
