Astanada Sultan Orazalın týraly derekti fılmniń tusaýkeseri ótedi
ALMATY. 4 maýsym. QazAqparat - Astanada ótetin «Zamandas kelbeti» derekti fılmder aptalyǵynda AQSh-tyń Nıý-Iork qalasynda 20-24 mamyr kúnderi ótken ІІ Eýrazııa kınofestıvali jeńimpazynyń 2 týyndysy kórsetiledi.
L. Gýmılev atyndaǵy Eýrazııa ulttyq ýnıversıtetinde 4 maýsym kúni bastalatyn bul sharaǵa Sh. Aımanov atyndaǵy «Qazaqfılm» kınostýdııasynda shyǵarylǵan 5 fılm qatyspaq. Onyń ekeýiniń, atap aıtqanda Sultan Orazalın týraly «Rýhanııat sardary» jáne Kamal Ormantaev týraly «Akademık Ormantaev» týyndylarynyń avtory - Jánibek Jetirýov.
«Qazir Myrzataı Joldasbekov týraly derekti fılmdi túsirip júrmin. Sondaı-aq Oralhan Bókeev týraly derekti fılmniń jáne O. Bókeevtiń pen Ábish Kekilbaevtyń povesteri boıynsha tolyq metrajdy kórkem fılmderdiń stsenarııin jazyp jatyrmyn. Al Nıý-Iorktegi festıvalde «Aqqyz» kórkem fılmi uıymdastyrýshylardyń óz tańdaýy boıynsha kórsetildi. Onda bıyl derekti, qysqa jáne tolyq metrajdy 35 fılm baıqaý baǵdarlamasyna qatysty», - deıdi J.Jetirýov. Rejısserdiń aıtýynsha, onda tolyq metrajdy fılmder arasynda «Aqqyz», derekti fılmder arasynda Álııa Nazarbaevanyń «Oıanýy» («Probýjdenıe») jeńimpaz atanǵan. Bul festıvalde buǵan deıin Ermek Tursynovtyń «Kelin» fılmi de tolyq metrajdy fılmder arasynda elge bas júldemen oralǵan bolatyn.
«Jalpy bul «Aqqyzdyń» altynshy festıvali. Buǵan deıin ol uıymdastyrýshylardyń qalaýy boıynsha baıqaýdan tys qatysyp kelse, bul joly baıqaýdyń negizgi baǵdarlamasynan oryn alyp otyr. Meniń endigi armanym sheteldegi festıvalderde kınosynshylar tarapynan joǵary baǵalanyp júrgen atalmysh týyndyny Qazaqstanda ótetin dodalarǵa qosý. Óıtkeni bul qazir otandyq kórermenniń nazaryn aýdarýdyń birden-bir joly bolyp tur», - deıdi J. Jetirýov.
