Astanada sýıtsıdke beıim balalarǵa jedel kómek kórsetý toby quryldy
ASTANA. QazAqparat - Astanada ózine-ózi qol jumsaýǵa beıim balalarǵa konsýltatıvtik jáne psıhologııalyq kómek kórsetetin jedel top quryldy. Bul týraly búgin Astana qalalyq máslıhatynyń 40-sessııasynda qalalyq bilim basqarmasynyń basshysy Elmıra Sýhanberdıeva aıtty.
«Búginde elordadaǵy sýıtsıdtik ahýaldyń aldyn alý úshin vedomstvoaralyq qarym-qatynastardyń júıeli josparlary bekitildi. Sol jospar boıynsha tájirıbeli psıhologtar men dáriger-psıhıatrlardan top qurylyp, olar sýıtsıd oryn alǵan bilim berý mekemeleriniń ustazdar ujymyna, balalarǵa, jalpy, sýıtsıdke beıimi bar, psıhologııalyq jaǵynan turaqsyz jasóspirimderge konsýltatıvtik jáne psıhologııalyq kómek kórsetýde», - dep atap ótti ol.
Sondaı-aq, stýdentter arasyndaǵy quqyqbuzýshylyqtar men sýıtsıd oqıǵalarynyń aldyn alý maqsatynda oqý jylynyń basynan bastap elorda kolledjderinde 10-nan astam áleýmettik jobalar iske asyrylýda. Olar jastardyń boıyndaǵy rýhanı-adamgershilik, patrıottyq sezimderdi oıatyp, kez kelgen máseleni aqylmen sheshýge bolatynyna kóz jetkizýge baǵyttalǵan
«Bizde árbir kolledjdiń basshysy úlken jaýapkershilik arqalap júr. Sondaı-aq, olardyń orynbasarlarymen de turaqty túrde sýıtsıdtiń aldyn alý boıynsha josparly jumystar júrgizilip turady», - dep atap ótti bilim basqarmasynyń basshysy.
Onyń aıtýynsha, búginde túrli quqyqbuzýshylyqtar, sýıtsıd pen erte júkti bolyp qalý máseleleri Astananyń kolledjderinde ǵana emes, birqatar joǵary oqý oryndarynda da beleń alyp tur.
