Astanada sýǵa ketken balalardyń biri aýrýhanaǵa jetkizildi
ASTANA. QazAqparat - Astanada úsh birdeı otbasy qara jamyldy. Prıgorodnyı kentindegi Nura-Esil sý arnasynan 4 balanyń máıiti tabyldy. Kámeletke tolmaǵan balǵyndar ruqsat etilmegen aýmaqta shomylǵan, dep habarlaıdy 24.kz.
Ómirdiń qyzyǵyn kórip úlgermegen jetkinshekterdiń jazataıym jaǵdaıǵa dýshar bolýy olardyń et jaqyndaryn ǵana emes, estigen jurttyń qabyrǵasyn qaıystyrdy.
Keshe osy oqıǵaǵa baılanysty túngi saǵat 12 shamasynda «112» qyzmetine 3 balanyń joǵalǵany jóninde aqparat kelip túsken. Ádette ýlalp, shýlap jatatyn, kóńildi aýla bir sátte tynshyp qaldy. Tym-tyrys. Kóshege shyqqan balalardyń da búgin oınaýǵa murshasy joq. Tek terezeden qara jamylǵan otbasy músheleriniń joqtaýy estiledi. Búgin tań sáride Nura-Esil sý arnasynan 4 balanyń denesi tabyldy. Olar keshe túski ýaqytta sý jaǵasyna oınaýǵa ketip, sodan oralmaǵan.
«Ol balalar sýǵa túsýge ruqsat etilmegen jerge túsken kezde qaza bolǵan. Jedel-izdestirý sharalarynyń sheńberinde, polıtsııa qyzmetkerleriniń aıtýy boıynsha, keshe bul balalar túski saǵat birdiń kezinde arna jaqqa oınaýǵa ketip, sodan qaıta oralmaǵan. Qaza tapqandardyń ekeýi bir úıdiń balalary bolyp shyqty. Biri - 11-de, ekinshisi 7 jasta edi»,-dedi Astana qalasy Tótenshe jaǵdaılar departamentiniń resmı ókili Aıagóz Fazylova.
«Shomylyp jatqan kezde taıyp ketip túsken edi. Ol balalardy ózimiz kórdik. 5 bala boldy. Bireýi jansaqtaý bóliminde jatyr dep estidik. Jańaǵy balany qutqaryp alǵan kezde, alǵashqy kómek kórsetý úshin janymyzdaǵy aǵamyz kómektesti. Perishtesi qaǵyp, ajaldan áýpirimdep aman qalǵan bala keshe keshke ekinshi qalalyq balalar aýrýhanasyna jetkizildi»,-deıdi qala turǵyny Qýanysh Qudaıberdıev.
«Aldyn ala «asperatsııalyq pnevmonııa» degen dıagnoz qoıyldy. Dárigerler naýqasty kúrdeli stomatıka bólimine ornalastyrdy. Qazirgi tańda bala densaýlyǵy turaqtaldy. Ómirine qaýip joq. Dárigerlerdiń baqylaýymen tıisti emin qabyldap jatyr. Aıdyń-kúnniń amanynda bir kúnde 3 otbasy qara jamylyp qaldy. Qaıǵy jutqan jandardyń jaqyndary da janyn qoıarǵa jer tappaı júr»,-deıdi Astana qalasy ákiminiń baspasóz hatshysy Elvıra Júrgenbaeva.
