Astanada sýǵa ketken 12 adamnyń 11-i mas bolǵan
ASTANA. QazAqparat - Jyl basynan beri Astana qalasynyń sý aıdyndarynda 12 adam sýǵa ketti, olardyń barlyǵy derlik alkogoldi ishimdikke mas bolǵan, dep habarlaıdy «QazAqparat» HAA tilshisi.
«Alǵashqy jartyjyldyqta Astana aýmaǵynda 12 adam sýda mert boldy, onyń bireýi jas sábı bolsa, qalǵan 11-i mas kúıinde sýǵa túsken eresekter», - dedi Astana ákimdiginde ótken brıfıngte Astana qalasy Tótenshe jaǵdaılar departamentiniń bastyǵy, azamattyq qorǵaý polkovnıgi Barat Duzaqbaev - Shynynda da bıylǵy aptap ystyqtyń beti qaıtar emes, qala halqy sýda shomylyp, salqyndaǵysy keledi. Degenmen, Astana aýmaǵynda shomylýǵa ruqsat berilgen 3 oryn ǵana bar, olar - Ortalyq jaǵajaı, «Trı peskarıa» jáne «Stolıchnyı dvor».
Departament basshysy atalǵan jaǵajaılardyń adam ómirine qaýipsiz birden-bir shomylý oryndary ekenin basa aıtty.
«Shomylý maýsymy ashylmaı turyp, súńgýirler ruqsat berilgen oryndardaǵy sý túbin tekserip jáne adamnyń júzýine kedergi keltiretin qoqystardan, butaqtardan, shólmek synyqtarynan tazartady. ıAǵnı, adam jaraqat almaýy úshin jaǵajaı aldyn ala ázirlenedi. Bıyl mert bolǵan 12 adamnyń barlyǵy shomylýǵa ruqsat etilmegen jaǵada sýǵa túsken. Biz taýyp alǵan úsh máıit te alkogoldi ishimdikke mas bolǵan jáne sý astyndaǵy butaqtarǵa ilinip qalyp, keri shyǵa almaǵan», - dep tolyqtyrdy ol.
Sondaı-aq, brıfıng spıkerleri elordanyń shomylýǵa ruqsat berilgen oryndarynda kezekshilik uıymdastyrylǵanyn, oǵan 20 adam men 9 kater jumyldyryǵanyn atap ótti. Úzdiksiz kezekshilik pen eskertý jumystarynyń nátıjesinde sońǵy aıda bul oryndarda qaıǵyly oqıǵalar tirkelmegen.
