Astanada sýǵa batqan balany qutqaryp qalǵandar tabyldy
ASTANA. QazAqparat - QR ІІM Tótenshe jaǵdaılar komıteti sýǵa batyp bara jatqan balanyń ómirin saqtap qalǵan azamattardy marapattaıdy, dep habarlaıdy QazAqparat tilshisi TJK resmı ókili Rýslan Imanqulovqa silteme jasap.
«Úlkenderdiń qaraýynsyz qalǵan bala Esil ózeniniń jaǵasynda oınap júrgende abaısyzda sýǵa túsip ketip, ózdiginen shyǵa almaǵan. Sol mańdaǵy adamdar ony baıqap qalyp, balany qutqarǵan. Bizdegi derek boıynsha, bala 5-6 jas shamasynda», - deıdi R. Imanqulov QazAqparat tilshisine telefon arqyly bergen suhbatynda.
Onyń aıtýynsha, kishkentaı balany ınkassator Arman Smaǵulov, stýdentter - Angelına Dármenbaeva jáne Tımýr Nasıbýllınder qutqarǵan.
TJK ókilderi olarmen baılanysyp úlgergen.
«Biz úzbeı baılanys jasap otyrmyz, jýyq arada balanyń ómirin saqtap qalǵan azamattardy marapattaımyz. Qazir oqıǵanyń tolyq mán-jaıyn bilý jáne oǵan qatysqandardyń bárin atap ótý úshin sol qutqarylǵan balanyń ózin izdep jatyrmyz», - deıdi R. Imanqulov.
Eske sala keteıik, keshe Astanada sýǵa batyp bara jatqan balany belgisiz adamdardyń qutqaryp alǵany týraly habarlaǵan bolatynbyz.
