Astanada sýdyń tarıfi 1 shildeden bastap 10 teńgege qymbattaǵan

ASTANA. QazAqparat – Ulttyq ekonomıka mınıstrligi Tabıǵı monopolııalardy retteý komıtetiniń departament basshysy Qanat Qulnazarov elordadaǵy kommýnaldyq tarıfter 1 shildeden bastap qalaı ózgergenin málim etti, dep habarlaıdy QazAqparat tilshisi.

«Búgingi tańda departament tabıǵı monopolııa sýbektileriniń báriniń tarıfine usynylǵan túzetýlerdi bekitti. Bul tarıfter 2023 jyldyń 1 shildesinen bastap qoldanysqa endi. Tek jylý energııasynyń jańa tarıfi ǵana 1 tamyzdan bastap qoldanysqa enedi», - degen komıtet ókili sý tarıfine jeke toqtaldy.

«Astana qalasynyń sýmen jabdyqtaý jáne sý burý salasynda «Astana sý arnasy» memlekettik kommýnaldyq kásiporny qyzmet kórsetedi. Bekitilgen tarıf aıasynda mynandaı sharalar kózdelgen:

Birinshiden, sý burý jelilerin jóndep, rekonstrýktsııalaýǵa, qondyrǵylar men arnaıy tehnıkany jańartýǵa 1,2 mlrd teńge qosymsha ınvestıtsııa bólý. Ekinshiden, elektr qýatyna jumsalatyn shyǵyndy arttyrý. «Astana arnasy» úshin bul strategııalyq taýar bolyp esepteledi. Úshinshi kásiporyn jumysshylarynyń ortasha nomınaldy aılyqtaryn ósirý. Osy aıtylǵan faktilerdi eseptesek, sýmen jabdyqtaý jáne sý burý tarıfi halyq úshin orta eseppen 10 teńge aınalasynda ózgertildi. 1 tekshe metr sýyq sýdyń tarıfi 48 teńgeden 58 teńgege deıin, sý burý tarıfi 7,5 teńgege ósedi. Negizi kásiporyn tarıfti 21 teńgege nemese 37 paıyzǵa ósirý týraly ótinim bergen bolatyn», - dedi Qanat Qulnazarov.