Astanada sý jáne káriz ınfraqurylymyn jańǵyrtýǵa 20-ǵa jýyq joba iske asady
ASTANA. KAZINFORM – Astana qalasynyń ákimi Jeńis Qasymbek áleýmettik jelidegi paraqshasynda elordadaǵy sýmen jabdyqtaý, sý burý jáne nóserli káriz júıelerin damytý baǵytynda aýqymdy jumystar júrgizilip jatqanyn málimdedi.
— Sharýashylyq-turmystyq káriz júıelerin, nóserli kárizderdi, sýmen jabdyqtaý júıelerin jáne t. b. ınfraqurylym nysandaryn salý boıynsha júıeli jumys júrip jatyr.
Aýyz sý tapshylyǵyn boldyrmas úshin ótken jyly stantsııalarǵa bastapqy sýdy táýligine 50 myń m³ kóleminde jetkizetin tehnıkalyq sý qubyryn salýdy bastadyq, — dedi ol.
2025 jyldyń qorytyndysy boıynsha 3,2 km qubyr salyndy. Bıyl 5 aıda — 5,8 km. Osyǵan deıin, 2023 jyly úshinshi sorǵy-súzgi stantsııasynyń (SSS-3) jumysy iske qosylǵan bolatyn.
— Aldaǵy jyldary magıstraldy sý qubyry jelilerin salý boıynsha shamamen 20 jobany iske asyrý qajet. Qalanyń damýy men sý tutyný kóleminiń artýyn eskerer bolsaq, atalǵan jobalardy júzege asyrý elordany senimdi ári úzdiksiz sýmen qamtamasyz etýge múmkindik beredi.
Elordanyń sý burý júıesine toqtalsam: ótken jyly sharýashylyq-turmystyq káriz jelileriniń 10 shaqyrymy jáne káriz-sorǵy stantsııasyn salý boıynsha 2 joba tolyq aıaqtaldy. Bıyl 2 káriz-sorǵy stantsııasyn salý boıynsha 2 jobany aıaqtaý josparlanyp otyr, — dedi qala basshysy.
Qazirgi ýaqytta ortasha sý burý kólemi — 350-360 myń m³/táýlik (jyl saıynǵy ósim shamamen 10 myń m³/táýlik) deńgeıinde. Aǵyndy sýlar qoldanystaǵy káriz-tazartý qurylystary (KTQ) arqyly tazartylady.
Qýattylyǵyn arttyrý maqsatynda bıyl táýligine 188 myń m³ ónimdilikke ıe KTQ-2 nysany jáne oǵan kiretin-shyǵatyn kollektorlar qurylysy bastalady.
Sonymen qatar Kóktal, Óndiris eldi mekenderinde jáne Indýstrııalyq park aýmaǵynda jalpy ónimdiligi táýligine 85 myń m³ bolatyn jergilikti tazartý qurylysyn (TQ) jobalaý jumysy júrgizilýde, sondaı-aq qoldanystaǵy KTQ-1 nysanyn jańǵyrtý arqyly onyń ónimdiligin táýligine 25 myń m³-ge arttyrý josparlanyp otyr.
— Elordanyń nóserli káriz júıesi 20 tazartý qurylysy men bir jınaqtaý toǵanynan, sondaı-aq 621 km bolatyn magıstraldyq kollektordan, nóserli, drenajdy jáne aryq-naýaly káriz jelilerinen quralady, olar 20,1 myń gektardan astam aýmaqtyń jerústi aǵyn sýlaryn burýǵa múmkindik beredi.
Sońǵy jyldary nóserli, drenajdy jáne aryq-naýaly káriz júıeleriniń magıstraldyq kollektorlary boıynsha 22 km-den astam jeli salynyp, qaıta jańǵyrtyldy, sondaı-aq 9 sorǵy stantsııasy men 6 tazartý qurylysy iske qosyldy. Máselen, 2025 jyly 5 nysan boıynsha qurylys jumysy aıaqtaldy: Qorǵaljyn tas jolynyń soltústigi, TQ III-6-ǵa № 2 kollektor (Ilınka eldi mekeni), II-4 aýdanyndaǵy (Myńjyldyq) TQ jáne t. b. Nátıjesinde júrgizilgen sharalar arqyly jerústi aǵyn sýlaryn burý aýmaǵy 16,7 myń gektardan 20,1 myń gektarǵa deıin keńeıtildi.
Trıatlon parki aýdanyndaǵy TQ 1-4 jáne Aqjol kóshesi boıyndaǵy TQ 6-1 tazartý qurylysyn salý jáne keńeıtý jumysy júrip jatyr. Bul jobalardy iske asyrý Almaty men Baıqońyr aýdandaryndaǵy birqatar kóshe men joldy sý basý qaýpin azaıtady, — dep jazdy Jeńis Qasymbek.
Aıta ketelik Astanada 1,7 mln teńge memlekettik grantty kimder ala alatyny týraly jazǵan edik.
