Astanada sý tasqynynyń saldaryn joıý jumystary jalǵasyp jatyr
ASTANA. QazAqparat - Elordada sý tasqynynyń saldaryn joıý jumystary jalǵasýda. Bul týraly astana.kz saıtyna TJD baspasóz qyzmetinen habarlady.
Táýlik ishinde 420 ótinish kelip tústi, 14211 m³ sý sorylyp, shyǵaryldy. Keshe adamdardy evakýatsııalaý júrgizilgen joq, qonaq úılerde 28 adam, sonyń ishinde 6 bala turyp jatyr.
Departament psıhologtary aǵymdaǵy emotsıonaldyq jaǵdaıdy anyqtaý jáne psıhologııalyq kómek kórsetý úshin zardap shekkendermen áńgimelesý ótkizýde.
«Qazirgi ýaqytta zardap shekkender medıtsınalyq jáne psıhologııalyq kómekke júgingen joq», - dep habarlady vedomstvodan.
Eske salaıyq, 6 sáýirden bastap Shyǵys Ilınka turǵyn alabynda Beket ata kóshesinde ornalasqan turǵyn úılerdiń sý astynda qalýyn boldyrmaý úshin Dospambet jyraý kóshesinde ýaqytsha qorǵanys bógetin salý jumystary qolǵa alyndy. Bógettiń uzyndyǵy 250 metr (eni 1 m, bıiktigi 60 sm), 7500 qap ınertti materıal tóseldi, sondaı-aq, jalpy uzyndyǵy 100 metrlik soqpaqtar jasaldy.
Bul jumystarǵa 191 tehnıka men jeke quramnan 99 adam tartyldy. Jalpy alǵanda, Departamentten 4 tehnıka, jeke quramnan 58 adam, «Astana Sý Arnasy» MKK - 2 tehnıka jáne 3 adam; «Astana Tazalyq» JShS - 21 tehnıka, 38 adam jumyldyryldy.
