Astanada sý tasqynyna qarsy is-sharalar kúsheıtildi
ASTANA. 14 naýryz. QazAqparat - Sınoptıkterdiń boljamynsha, elordada taıaý kúnderi kún jylynady.
Jańbyr aralas qar jaýyp, aýa temperatýrasy 10 gradýsqa deıin kóterilýi yqtımal.
Astana qalasy ákiminiń orynbasary Vasılıı Krylovtyń tapsyrmasyna sáıkes Almaty, Saryarqa, Esil aýdandarynyń ákimderi qaladaǵy iri memlekettik, áleýmettik-mádenı jáne saýda, oıyn-saýyq oryndaryn aralap, basshylaryna ǵımarattardyń shatyrlaryn qardan tazalaý jóninde túsinik jumystary júrgizildi.
Astana qalasy ákimi apparatynyń ómir tirshiligin qamtamasyz etý jáne ınfraqurylymdardy damytý bólimi atap kórsetkenindeı, aýa raıynyń kúrt jylynýy men túnde salqyndap, muzdyń qatýyna baılanysty qaladaǵy barlyq menshik ıeleri nysandar men ǵımarattardy, turǵyn úı qorlaryn qardan tazalaýǵa, basqa da is-sharalardy atqarýǵa asqan jaýapkershilikpen qaraýlary qajet.
Qazir qalada sý tasqynyna qarsy daıyndyq jumystary burynǵydan da kúsheıtildi.
Vedomstvodan astana.kz saıtyna habarlaǵandaı, merdigerlik uıymdar kúshimen balabaqsha, emdeý mekemeleri, aýla aýmaqtary qardan tazalanyp, birinshi kezekte sý basýy múmkin osal tustar anyqtalýda.
Eske salaıyq, sý tasqyny komıssııasy qala aýmaǵynda osyndaı osal 19 áleýetti ýchaskeni anyqtaǵan bolatyn. Qazir bul jerlerde erigen qar sýynyń jınalýyn boldyrmaý úshin qarqyndy is-sharalar atqarylýda.
Sondaı-aq, Astana qalasy ákimi apparatynyń ómir tirshiligin qamtamasyz etý jáne ınfraqurylymdardy damytý bólimi barlyq jekemenshik uıymdarǵa da shatyrlardy qardan tazartyp, sý tasqynyna qarsy baǵyttalǵan júıeli jumystar júrgizilýin eskertedi.
