Astanada sý tasqyny kezeńine keshendi daıyndyq jumystary júrgizilýde
ASTANA. QazAqparat - Qala ákimdigi 2019 jyly Astana aýmaǵynda tasqyn sýdy uıymdasqan túrde ótkizý boıynsha keshendi jospardy bekitti, dep habarlaıdy elorda ákimdiginiń resmı saıty.
«Qalanyń barlyq turǵyn alaptary eskerildi. Naqtyraq aıtqanda, Ilınka, Óndiris, Kóktal, Jeleznodorojnyı, Prıgorodnyı jáne Ońtústik-Shyǵys aýdandary, «Nurly Jol» temirjol vokzaly, N. Nazarbaev atyndaǵy Halyqaralyq áýejaı men gaz apparatýrasy zaýyty aýmaqtaryna erekshe nazar aýdaryldy», - delingen Astana qalasy TJ departamentiniń habarlamasynda.
Osy aýdandarda sý tasqynyna qarsy ınjenerlik jumystar júrgizilýde. Kishi Taldykól kóli aýdanynda, Óndiris turǵyn alaby aýdanynyń Sarybulaq ózeniniń janyndaǵy dambalar nyǵaıtylyp, Maıbalyq kólinen Nura-Esil kanalyna deıin jumys istep turǵan arnany tazalaý jumystary júrgizilýde. Azamattyq qorǵanys qyzmetteri men aýdan ákimderine tıisti tapsyrmalar berildi.
Aǵymdaǵy qys mezgilinde shyǵarylǵan qar kólemi 2,28 mln tekshe metrdi qurady.
«Áleýmettik mańyzy bar nysandardyń aýmaqtaryna (mektepke deıingi, mektep jáne medıtsınalyq mekemeler, JOO), turǵyn úı alaptary men qurylys alańdaryna erekshe kóńil bólindi», - delingen habarlamada.
