Astanada sý tasqyny qaýpi bar 34 aýmaq belgilendi
ASTANA. QazAqparat - Jyl saıyn qaıtalanatyn kóshelerdi sý alyp ketý qaýpine baılanysty Astanada bıyl qandaı jumystar atqarylyp jatyr? Jaýapty vedomstvolar kóktemniń bul mashaqatyna daıyn ba? Ózekti másele jaıly elordadaǵy kóshpeli brıfıng kezinde Astana qalalyq tótenshe jaǵdaılar departamenti bastyǵynyń mindetin atqarýshy Marǵulan Amanbaev aıtyp berdi, dep habarlaıdy QazAqparat tilshisi.
«Búgingi kúni Astana qalasynyń ákimdigimen birlese otyryp, kóktemgi sý tasqynynyń aldyn alý boıynsha jumys jospary quryldy. Ol josparda 255 tarmaq bar. Astanada kóbinese qar sýynan másele týyndaıtynyn bilesizder. 2017-2018 jyldary bolǵan jaǵdaılardy taldaı otyryp, qar sýy alyp ketýi múmkin degen 34 aýmaqty belgilep otyrmyz. Ol aýmaqtarǵa turǵyn úıler, óndiris aımaqtary jatady», - deıdi Astana qalalyq tótenshe jaǵdaılar departamenti bastyǵynyń mindetin atqarýshy Marǵulan Amanbaev.
Departament ókiliniń aıtýyna qaraǵanda, qazirgi tańda Astana sý qoımasynda 245 mln tekshe sý bar. Qoımanyń maksımaldy sýdy ustap turý múmkindigi - 410 mln tekshe.
«Qoımadan keletin sý elordadaǵy kontrregýlıatorǵa kelip túsedi. Ol jerde qazirgi tańda sý joq. ıAǵnı, sýdyń orny bos. Qazir Astana sý qoımasynan jiberilip jatqan sýdyń kólemi 4 mln tekshe ǵana. Birinshi beket arqyly ol sý Esil ózenine aǵyzylady. Jalpy, Astana qalasynyń TJD men ákimdigi, basqa da qurylymdar elordada sý tasqynynyń aldyn alý úshin úlken jumys atqardy. Elordada ótken «Kóktem-2019» respýblıkalyq oqý-jattyǵýda Astana qalasy sharýashylyqtarynyń tehnıkalaryn, adamdarynyń daıyndyǵyn pysyqtap aldyq. Myńnan asa adam men 600 tehnıkanyń daıyn turǵanyn kórdik», - deıdi ol.
Marǵulan Amanbaevtyń sózine sensek, osy ýaqytqa deıin Astana qalasynan polıgondarǵa 2 mln tonnadan artyq qar shyǵarylǵan. 500-den asa tehnıka men 300-ge tarta adam qar shyǵarý jumysymen aınalysyp jatyr.
«Astana qalasy boıynsha aryqtar men nóser kanalızatsııalarynyń qubyryn tazartý jumystary da qyzý júrip jatyr. 22 myń shaqyrymdyq aryq tazartylyp, qatqan muzdardyń bári alynyp jatyr. Árbir jeke turǵyn úıdegi azamattar aýladaǵy qardy syrtqa shyǵaryp berse boldy, kommýnaldyq uıymdar ol qardy qala shetindegi polıgonǵa tasıdy. Elordada ondaı 4 polıgon bar. Astana qalasynan 2 mln tonnadan artyq qar shyǵarylǵanyn atap ótken edik. Bul kórsetkish byltyrǵydan shamamen 300-400 myń tekshege artyq», - deıdi Marǵulan Amanbaev.
