Astanada sý tasqynynyń aldyn alý men saldary týraly pikirtalas ótti
ASTANA. KAZINFORM – Nazarbaev ýnıversıtetinde tabıǵı apattar, onyń ishinde sý tasqynyna qatysty sarapshylar ózara pikir almasty.
Tolyǵyraq atalǵan sharany uıymdastyrýshy, SDNH Youth Kazakhstan jobalyq menedjeri, Nazarbaev ýnıversıteti Saıasattaný jáne halyqaralyq qatynastar baǵytynyń stýdenti Nursaıa Alpysbes aıtyp berdi.
«Búgingi is-sharany biz osydan úsh apta buryn uıymdastyrmaq bolǵanbyz. Biraq onyń taqyryby jer silkinisiniń zardaby týraly edi. Degenmen el aýmaǵynda sý tasqyny bastaldy, sondyqtan taqyrypty ózgerttik. Búgingi jıynda sý tasqyny, onyń sebebi men saldary týraly talqylandy. Sonymen qatar bolashaqta sý tasqynynyń aldyn alýdy neden bastaý kerek, qandaı sharalar qabyldaý kerek degen máseleler kóterildi», - dedi BAQ ókilderine atalǵan is-sharanyń mańyzdylyǵy týraly aıtqan Nursaıa Alpysbes.
Spıkerdiń paıymdaýynsha, qazir óńirlerdegi sý tasqynynyń sebep-saldaryn anyqtaý jáne aldaǵy ýaqytta ony boldyrmaý úshin ǵylymı zertteý jumystaryn qolǵa alý kerek, ıaǵnı, granttar bólip, sala mamandaryn kóptep tartý qajet.
«Sý tasqynynyń aldyn alýǵa bolady, biraq ol ýaqyt, qarajat pen júıeli zertteýdi talap etedi. Qazirgi sý tasqynynyń zardaby úlken zalalǵa alyp kelýi múmkin, sondyqtan da máseleniń mánin zertteýge mamandardy tartýymyz kerek. Sonymen qatar sheshimdi ýaqtyly qabyldaǵan jón», - deıdi ol.
Aıta keteıik, búgin elordadaǵy Nazarbaev ýnıversıtetinde tótenshe jaǵdaılarǵa tótep berý máseleleri boıynsha sarapshylardyń pikirtalasy ótti. Atalǵan is-shara Nazarbaev ýnıversıteti, oǵan qarasty Qyzyl aı qoǵamy men BUU Turaqty damý sheshimderi jelisiniń jahandyq jastar bastamasymen uıymdastyryldy.
Dıskýssııa barysynda tabıǵı apattar, onyń ishinde sý tasqyny, jer silkinisi, orman órtteri men epıdemııalyq jaǵdaı boıynsha sala mamandary pikir bildirdi.
