Astanada sý tasqynyna qarsy jumys júrgizilip jatyr
ASTANA. KAZINFORM – Astana qalasynyń ákimi Jeńis Qasymbek Instagram-daǵy paraqshasynda sý tasqynyna qarsy qandaı sharýalar atqarylyp jatqany týraly jazdy.
Elorda ákimdigi saıtynyń habarlaýynsha, bıyl sý tasqyny qaýpi bar ýchaskelerdiń sany 20-ǵa deıin azaıǵan.
«Qalada sý tasqynyna qarsy jumys belsendi júrip jatyr. Kommýnaldyq qyzmetter 7 mln 100 myń tekshe metrden astam qar shyǵardy, bul ótken qys mezgiliniń sáıkes kezeńimen salystyrǵanda 2 mln tekshe metrge artyq. Ótken jyldarmen salystyrǵanda sý tasqyny qaýpi bar ýchaskelerdiń sany 20-ǵa deıin azaıdy. Qazirgi ýaqytta aryq-naýa jelisiniń 61 myń 600 pogondyq metrden astamy tazartyldy, 14 myń pogodyq metrden astam kollektor jýyldy, 9 myń 400 pogondyq metrden astam qubyr, 4 myń dana baqylaý, jańbyr qabyldaý qudyǵy jáne t.b. býlandyryldy. Sondaı-aq nóserli káriz júıelerine zańsyz kirme joldardy anyqtaý boıynsha jáne t.b. jumystar júrgizilip jatyr, - dedi Jeńis Qasymbek.
Ol sonymen qatar elordany aralaý barysynda qalany sý tasqynynan ınjenerlik qorǵaýǵa jaýapty Astana kontrregýlıatoryna, sondaı-aq Esil ózeniniń arnasyn qaıta jańartý ýchaskelerine barǵanyn atap ótti.
«Qorǵanys qurylymynyń jalpy kólemi 450 mıllıon tekshe metrden asady. Qazirgi ýaqytta nysannyń toltyrylý kórsetkishi shamamen 48 mıllıon tekshe metrdi quraıdy. Sý deńgeıin turaqtandyrý maqsatynda nysannan 10 m3/s kóleminde sý aǵyzylady. Sonymen birge Esil ózeniniń akvatorııasynyń deńgeıin retteý jáne qalanyń ortalyq bóliginde sý kóligi qatynasyn qamtamasyz etý maqsatynda Esil ózeniniń arnasyn qalpyna keltirý júrgizilip jatyr. Bul jumystyń bári jalǵasýda. Azamattyq qorǵaý organdary, kommýnaldyq qyzmetter jáne t.b turaqty daıyndyqta. Sol sııaqty Aqmola oblysynda sý tasqynyna qarsy is-sharalardy ótkizý maqsatynda 100-den astam júk jáne mamandandyrylǵan tehnıka bólindi», - dep jazdy Jeńis Qasymbek.
