Astanada sý tasqynyna qarsy aýqymdy sharalar júrgizilip jatyr
ASTANA. KAZINFORM — Astanada sý tasqynynyń aldyn alý baǵytynda keshendi jumys atqarylyp jatyr. Aryq-naýa jáne nóserli káriz jelilerin tazalaý, tazartý qurylysyn salý jáne qaıta jańǵyrtý, qar shyǵarý jumysy júrgizilip jatyr.
Erigen qar sýyn aǵyzý boıynsha Keshendi is-sharalar jospary bekitildi. Bul máseleler ákimdikte ótken keńeste talqylanyp, oǵan TJD, «Qazsýshar» RMK, «Qazgıdromet» RMK jáne ózge de vedomstvolyq qurylymdar qatysty.
Qalanyń kommýnaldyq qyzmetteri 38 shaqyrym aryq-naýa jelisin jáne 16 shaqyrym nóserli káriz júıesin tazartty. Sonymen qatar 3,3 myńǵa jýyq baqylaý jáne jańbyr sýyn qabyldaıtyn qudyqtar tazalanyp, 530 metr qubyr býlandyrylyp tazartyldy, 884 tonna laı shyǵaryldy. Bıyl qys mezgilinde 4,6 mln tekshe metrden astam qar qala syrtyna shyǵaryldy.
Sý tasqynynyń aldyn alý jáne saldaryn joıý úshin ınertti materıaldar qory daıyndaldy. Azamattyq qorǵaý organdary men kommýnaldyq qyzmetter turaqty daıyndyq rejımine kóshirilgen.
«Astana sý arnasy» jelisi boıynsha 170 metr qysymdy jeli tartylyp, dıametri 400-1600 mm bolatyn magıstraldyq jeliler tazartylýda. Káriz-tazartý stantsııasynda (KTS) saǵatyna 5-7 myń tekshe metr sý aıdaıtyn 4 sorǵy ornatylǵan. Indýstrııalyq park aýdanynda Aqbulaq ózeni boıynyń jaǵalaýyn bekitý, ózen arnasyn keńeıtý jumysy júrgizilip jatyr.
Astana ákimi Jeńis Qasymbek áleýmettik nysandar, jekemenshik sektor jáne eldi mekender aýmaǵynan qardy ýaqytyly shyǵarý, sondaı-aq bógetter men gıdrotehnıkalyq qurylystardyń jaǵdaıyn turaqty baqylaýda ustaý qajettigin atap ótti.
Sý tasqyny kezeńine daıyndyq josparly túrde júrgizilip jatyr. Barlyq jumys táýlik boıy atqarylyp, turaqty baqylaýda.
Aıta ketelik Aqtóbede kóktemgi sý tasqynyna daıyndyq júrip jatqany týraly jazǵan edik.
