Astanada sý tasqyny kezeńine daıyndyq qalaı júrgizilip jatyr

ASTANA. KAZINFORM –  Astana qalasy Tótenshe jaǵdaılar departamenti aldaǵy sý tasqyny kezeńine daıyndyq aldyn ala bastalǵanyn aıtty, dep habarlaıdy elorda ákimdiginiń baspasóz qyzmeti.

Máselen, 2023 jyldyń qyrkúıeginde qalanyń 20 sý tasqyny qaýpi bar ýchaskeleri zerttelip, aýdan ákimderine qajetti sharalardy qabyldaý (kanaldardy tazalaý jáne tóseý, aryq júıesin ornatý jáne t.b.) týraly usynystar aıtyldy.

«Búgingi tańda kommýnaldyq qyzmetter qaladan 4,5 mln tekshe metrden asa qar shyǵardy. 17 myńnan astam qýma metr aryq-naýa jelisi, 160 qýma metr kollektorlar, 713 dana jańbyr qabyldaý qudyqtary tazartyldy, 130 qýma metr qubyr retteldi. «Astana Tazalyq» bazasynda 2,5 myń (2213 m3) tekshe metr qum men usaq tas (135 m3) kóleminde ınertti materıaldar qory daıyndaldy, taǵy 11 myń tekshe metr ınertti materıaldardy (9 800 m3 qum jáne 1 943 m3 dresva) jetkizýge kelisimshart bar», - dep habarlady TJD.

Budan basqa, TJ jaǵdaıynda azyq-túlik pen janar-jaǵarmaı materıaldaryn jetkizýge 12 memorandým jasaldy.

«1 aqpannan bastap Astana qalasy ákiminiń orynbasary saparlar sheńberinde sý tasqyny qaýpi bar ýchaskelerdi komıssııalyq tekserý boıynsha jumysty jalǵastyrdy. Sý tasqyny qubylystaryna ýaqtyly den qoıý maqsatynda jeke quramnyń 586 adamynan, 156 birlik tehnıkadan, 65 motopompadan turatyn azamattyq qorǵaý qyzmetteriniń jalpy toby quryldy», - dep atap ótti vedomstvoda.

Sondaı-aq, TJD qala turǵyndary men qonaqtaryn úı mańyndaǵy aýmaqtan kósheniń jol boıyndaǵy bóligine qardy ýaqtyly tazartýǵa, úıden aǵyndy aryqtarǵa nemese sý ótkizgish qubyrlarǵa sý burǵyshtar uıymdastyrýǵa, sý júrgizý quraldaryn aldyn ala kózdeýge shaqyrdy. Turmystyq elektr sorǵylary, shelekter, kúrekter jáne t. b. Daıyn turýy kerek. Sý basqan jaǵdaıda iKomek Qalalyq monıtorıng ortalyǵynyń «109» nómirine nemese qutqarý qyzmetiniń «112» nómirine dereý habarlaý qajet.