«Astanada sý taksıi paıda bolady» - BAQ-qa sholý
***
Keshe Aqordada Elbasy Nursultan Nazarbaevtyń tóraǵalyq etýimen «Nazarbaev Ýnıversıteti», «Nazarbaev zııatkerlik mektepteri» jáne «Nazarbaev qory» Joǵary qamqorshylyq keńesiniń ekinshi otyrysy ótti. Osy alqaly jıyndy arqaý etken maqala «Egemen Qazaqstan» gazetinde «Bolashaǵy bar ult bilimge umtylady» degen taqyryppen basyldy. Basylymnyń atap ótýinshe, jıyn bolashaqta kezegin kútip turǵan isterdi saralaý, tıisti qujattardy daıyndaý úshin ótkizilgen. Otyrys barysynda Elbasy: «Bizderde oqýlyqtardyń sapasyna qatysty problema bar. Sondyqtan da zııatkerlik mektepterge bul problemany sheshý jumystaryn basshylyqqa alýdy tapsyramyn. Biriktirilgen bilim berý baǵdarlamalaryn júzege asyrýdy qamtamasyz etetin oqýlyqtardy, ádistemelik materıaldar men sandyq bilim berý resýrstaryn ázirleýdi uıymdastyrý qajet. Búgin sizdermen barlyq máseleler boıynsha qabyldaǵan sheshimder joǵary bilimdi ult pen básekege qabiletti memleket qurýǵa taǵy bir qadam dep oılaımyn», - dedi.
Sonymen qatar osy basylymnyń jazýynsha, keshe Aqordada Memleket basshysy Nursultan Nazarbaev óz seriktesterimen dástúrli kezdesý ótkizdi. Áńgimelesý barysynda Qazaqstan Prezıdenti kezdesýge qatysýshylardyń árqaısysy búginde tulǵa retinde qalyptasqanyn jáne Qazaqstan Magnıtkasy olardyń kópshiligin belgili metallýrg, maman, basshy, jalpy, kásipqoı etip shyńdaǵanyn aıtty. «Nursultan Nazarbaev metallýrg naǵyz er adamnyń kásibi ekenine toqtaldy. Tek rýhy kúshti jáne jaýapkershiligi mol adamdar ǵana mundaı jumysqa tózimdi bolady. Sondyqtan qazaqstandyq jastardyń óskeleń býyny eńbek, jumys, ujym sııaqty qarapaıym, mańyzdy qundylyqtardy tereń túsinýge tıis», - delingen «Metallýrg - naǵyz er adamnyń kásibi» degen taqyryptaǵy aqparatta.
***
«Aıqyn» gazetiniń búgingi sanynda saıası ǵylymdar doktory, Astana qalasy «Kólik jáne kommýnıkatsııa kolledji» MKQK dırektory Zýlfýhar Gaıpovpen aradaǵy suhbat «Bilikti maman ǵana básekege qabiletti bolady» degen taqyryppen berilgen. Basylym tilshisiniń san salany qamtyǵan saýalyna óziniń tuşymdy jaýabyn bergen ol: «Atyraý qalasynda munaı-gaz salasy boıynsha, Ekibastuz qalasynda otyn-energetıka salasy boıynsha, Shymkent qalasynda óńdeý jáne Óskemen qalasynda mashına jasaý salalary boıynsha 4 iri óńiraralyq kásiptik ortalyq jumys isteıtin bolady. Mundaı eńbek bólinisi kezdeısoqtyq emes ári zańdy. Atalǵan aımaqtardyń damý úrdisi osy salalarmen tikeleı baılanysty. Sondyqtan bul aımaqtardyń ekonomıkalyq klasterler retinde tańdap alynýy tegin emes», - deıdi.
«Shyǵys Qazaqstan oblysy aımaqqa týrısti tartý jáne saıahatshylarǵa qyzmet kórsetý jaǵynan Astana men Almatydan keıin úshinshi orynda tur. 2012 jyly oblysqa uzyn sany 403396 týrıst kelip ketken», - dep jazady «Aıqyn» gazeti. Basylymnyń atap ótýinshe, ótken jyly kórsetilgen qyzmet kólemi 3 mlrd. teńge, ıaǵnı 2011 jylmen salystyrǵanda 13,4 paıyzǵa artqan.
***
«Kazahstanskaıa pravda» gazetiniń jazýynsha, Batys Qazaqstan oblystyq klınıkalyq aýrýhanasynda shuǵyl túrde erekshe ota jasalyp, patsıenttiń asqazanynan bir jarym keliden astam metall zattar alynǵan. Ota jasaǵan hırýrg Satybaldy Shuqylovtyń atap ótýinshe, júıke júıesi aýrýyna shaldyqqan 33 jastaǵy azamat birneshe jyl boıy temir zattardy jutyp kelgen. Álgi azamatqa mundaı ota osymen ekinshi márte jasalynyp otyr. Buǵan deıin 2004 jyly onyń asqazanynan birtalaı temir zattar alynǵan bolatyn.
***
Astanada sý taksıi paıda bolýy múmkin. «Ekspress K» gazetiniń jazýynsha, jolaýshylar tasymaldaýmen aınalysatyn elordalyq fırmalardyń biri óziniń kólik parkin birneshe katermen tolyqtyrýǵa nıet tanytyp otyr. Kompanııadaǵy menedjerlerdiń biriniń aıtýyna qaraǵanda, olar bul ıdeıany osydan eki jyl júzege asyrýǵa tyrysqan. Degenmen katerlerdi kúzetý qıyndyǵyna ári túngi ýaqytta turyp qalý uzaqtyǵyna basa nazar aýdara kele bul bastamalaryn keıinge ysyrǵan. Al endigi ýaqytta bul máseleni naqty qolǵa almaq.
