Astanada sý sorǵy stantsııasy men káriz-tazartý qondyrǵysy salynýda

ASTANA. QazAqparat – Elordada halyqty taza sýmen qamtý úshin úshinshi sorǵy-súzgi stantsııasy salynyp jatyr jáne taǵy bir káriz-tazartý qondyrǵysy jobalanýda. Bul týraly Úkimet otyrysynda káriz tazartý qurylystaryn salý jáne jańǵyrtý máseleleri qaralyp jatqan jıynda aıtyldy, dep habarlaıdy QazAqparat.

«Qazirgi ýaqytta elordada jalǵyz káriz-tazartý qondyrǵysy jumys isteıdi. Onyń jobalyq qýaty táýligine 254 myń tekshe metr, al naqty júktemesi – táýligine 260 myń tekshe metrden asyp tur. Halyq sanynyń ósý qarqynyn, sondaı-aq qurylystyń joǵary qarqynyn eskere otyryp, elordaǵa qosymsha sý jabdyqtary qýaty qajet», - dedi Astana qalasynyń ákimi Jeńis Qasymbek Úkimette.

Onyń aıtýynsha, qalany taza sýdyń tıisti mólsherimen qamtý úshin óndimdiligi táýligine 105 myń tekshe metr bolatyn úshinshi sorǵy-súzgi stantsııasy salynyp jatyr.

«Bul jobany kelesi jylytý maýsymyna deıin aıaqtaýdy josparlap otyrmyz. Jańa sorǵy-súzgi stantsııasy paıdalanýǵa berilgen soń, qazirgi káriz tazartý qondyrǵysyna júkteme de birneshe ese artady. Qosymsha paıda bolatyn káriz aǵyndaryn tolyqqandy tazartý úshin ekinshi káriz-tazartý qondyrǵysynyń qurylysy jobalanýda. Jobalyq-smetalyq qujattama men tehnıkalyq-ekonomıkalyq negizdeme qaralyp jatyr. Saraptamany alýdy 2023 jyldyń mamyr aıyna josparlap otyrmyz. Osydan keıin 2-3 jylda atalǵan jobany aıaqtaý qajet, tıisti jumys ortalyq memlekettik organdarmen birlesip júrgizilýde», - dep túsindirdi elorda ákimi.

Foto: gosuperior.com