Astanada «Sý - ómir nári» respýblıkalyq fotosýret konkýrsynyń jeńimpazdary marapattaldy
ASTANA. QazAqparat - Búgin Astanadaǵy Ulttyq akademııalyq kitaphanada «Qazgıdromet» RMK uıymdastyrýymen ótken «Tabıǵat - tal besik - 2014» fotosýret kórmesine QR Qorshaǵan orta jáne sý resýrstary mınıstri Nurlan Qapparov kelip, kásibı jáne áýesqoı fotograftardyń túsirgen sýretterimen tanysty.
«Búgin biz Halyqaralyq ekologtar kúnine baılanysty Qazaqstan, Reseı jáne Belarýs elderiniń ekologııa mınıstrleriniń kelisimimen Halyqaralyq senbilik ótkizdik. Endi bul shara dástúrli túrde jalǵasyp turady degen úmittemiz. Búgin Qazaqstan boıynsha ótken senbilikke 33 myń adam qatysyp, 280 tonna qoqys tazartyldy.
Osy aıtýly kúnniń aıasynda biz balalar sýretteriniń konkýrsyn ótkizdik. Onda búldirshinder qorshaǵan ortany qorǵaýǵa baılanysty óz oılaryn qaǵaz betine túsirip, tabıǵat-anaǵa degen mahabbattaryn qylqalam qýatymen jetkizip jatyr. Endi, mine, tabıǵat aıasynda túsirilgen fotosýretter konkýrsynda da qatysýshylardyń tabıǵatty aıalaı bilýdegi sheksiz sheberlikterine kýá bolyp otyrmyz», - dep atap ótti mınıstr.
«Qazgıdromet» RMK Bas dırektory Aıbek Meńdiǵarınniń aıtýynsha, bıyl atalǵan konkýrs «Sý - ómir nári» atty taqyryppen uıymdastyrylyp otyr.
«BUU Bas assambleıasy 2005-2015 jyldar aralyǵyn «Ómirge arnalǵan sý» qarqyndy áreketiniń Halyqaralyq onjyldyǵy dep jarııalady. Sonymen qatar, bizdiń elimizde de taza aýyz sý mańyzdy máselelerdiń biri ekeni belgili», - dep atap ótti ol.
Bas dırektordyń málimetinshe, bıylǵy konkýrsqa 677 fotosýret kelip túsken. Olardyń 80-i kórmege tańdalyp alynǵan. Júldeli oryndardy anyqtaý úshin sýretter ǵalamtorǵa salynyp, ınternet qoldanýshylardyń daýys berýi arqyly oryn ıelendirilgen. Daýys berý nátıjesinde 1421 daýyspen almatylyq Irına Sokoldyń sýreti 1-oryn aldy. Al 1301 daýys jınaǵan temirtaýlyq Erbolat Shadrahovtyń týyndysy 2-oryndy ıelense, 527 daýyspen almatylyq Elızarova Galınanyń fotosýreti 3-orynǵa turaqtady.
