Astanada sý qubyrynyń jarylýy saldarynan taǵy birneshe kósheniń boıyndaǵy úıler sýsyz qaldy

Qazaqstannyń Tótenshe jaǵdaılar mınıstrliginen habarlaǵandaı, búgin sáýirdiń 16-sy kúni túski saǵat 12 jarymda Almaty aýdany Fýrmanov kóshesi, 6-shy úıdiń mańynda sý qubyry jaryldy. Tesilgen qubyrdyń dıametri 500 mm-di qurady.

Tótenshe jaǵdaı saldarynan Fýrmanov pen Pavlov kósheleriniń boıyndaǵy turǵyn úıler sýsyz qalyp, Kazahskaıa kóshesindegi úılerde sý qysymy azaıdy.

Jóndeý jumystarymen «Astana sý arnasy» Memlekettik kommýnaldyq kásiporynnyń 12 adamy men 4 tehnıkasy aınalysýda.

Eske sala keteıik, osydan eki kún buryn osy Almaty aýdanyndaǵyAbylaı han kóshesi 17/1 úıdiń mańynda dıametri 400 mm bolatyn eskirgen sý qubyry jarylyp, sonyń saldarynan Maqtumquly kóshesi 3/1, Abylaı han dańǵyly 17, 17 «A», 17 «B», 19, 21, 25, 29/1, 27/1 turǵyn úıler, sondaı-aq №69-shy balabaqsha men Almaty aýdandyq Іshki ister bóliminiń ǵımaraty osy ýaqytqa deıin sýsyz qalyp otyr.