Astanada stýdenttik kınoteatr ashyldy

Kınoteatrdyń ashylý saltanatyna «Qazaqfılm» kınostýdııasynyń prezıdenti Ermek Amanshaev, belgili kınorejısser Rústem Ábdirashev,  akterler Nurjuman Yqtymbaev, Almagúl Álisheva jáne Májilis depýtattary, mınıstrlikter men elshilikter ókilderi qatysty.

«Stýdenttik kınoteatr» jobasynyń basty maqsaty tarıhymyzǵa altyn árippen jazylyp qalǵan otandyq klassıkalyq kınotýyndylarmen qatar, qazirgi bilim-ǵylym men mádenıetti keńinen nasıhattaıtyn qazaqstandyq jáne sheteldik fılmderdi tamasha tehnıkalyq sapada kórsetý arqyly jastardyń dúnıetanymyn keńeıtý.

«Stýdenttiń jalaqysy qaı kezde de tómen, jetpeı jatady. Bir joly kınoǵa baryp kelý úshin 1500 teńge qajet. Jigitter qyzdaryn aparsa, 3000 teńgege jýyq ketedi. Ony keıin taksımen aparý kerek. Osyndaı shyǵynnan keıin ekinshi ret barǵyń da kelmeı qalady. Ekinshiden, estetıkalyq, patrıottyq, rýhanı tárbıeniń kózi kıno bolyp qala beredi», - deıdi L.Gýmılev atyndaǵy Eýrazııa ulttyq ýnıversıtetiniń rektory Erlan Sydyqov.

Saltanatty shara barysynda «Qazaqfılm» men joǵary oqý orny arasynda ózara áriptestik týraly memorandýmǵa qol qoıyldy.

«Qazaqfılm» kınostýdııasynyń prezıdenti Ermek Amanshaevtiń aıtýynsha, memorandým aıasynda kınostýdııada túsirilgen qazaqtyń klassıkalyq týyndylary men sońǵy fılmderi kórsetilip, kınolardyń túsirý ujymymen kezdesýler ótkizilip turmaq. 

«Bul kınozaldy Astanadaǵy bizdiń kınostýdııanyń shyǵarmashylyq, óndiristik bazasy dep esepteıtin bolamyz», - dep atap ótti E. Amanshaev.

«Stýdenttik kınoteatr» jobasy arqyly ýnıversıtet stýdentteriniń mádenı demalysy anaǵurlym jemisti bolady. Munda jumsaq oryndyqtar, tamasha ekran, qýatty akýstıka, salqyndatý júıesi qarastyrylǵan. Osy arqyly ýnıversıtettiń elordalyq jáne elimizdegi jetekshi oqý orny retindegi ımıdji arta túspek.