Astanada stýdentterdiń sýıtsıdine qatysty saraptama qorytyndysy jaqynda daıyn bolady — ІІM

ASTANA. KAZINFORM — Іshki ister mınıstriniń orynbasary Sanjar Ádilov óz ómirin qıǵan Nazarbaev Ýnıversıtetiniń stýdentterine qatysty isti tergeý amaldaryna túsinik berdi. 

Búgin Parlament Májilisinde tilshiler mınıstrdiń orynbasarynan Nazarbaev Ýnıversıtetinde sýıtsıdke barǵan eki stýdentke qatysty istiń mán-jaıyn surady.

— Osy oqıǵalar eki bólek derek retinde tirkeldi. Bul ister mınıstrliktiń baqylaýynda tur. Qazir osy qylmystyq ister boıynsha sot-psıhologııalyq saraptamalar júrip jatyr. Bul saraptamalar óte kúrdeli, — dedi Sanjar Ádilov.

Onyń aıtýynsha, atalǵan tekserýler aıasynda sýıtsıdtiń sebebi anyqtalyp jatyr.

— Osy oraıda mamandar saraptama merzimin eki aıǵa deıin uzartady. Sondyqtan bul qylmystyq ister boıynsha qazan aıynyń sońyna deıin protsessýaldyq sheshim shyǵarylady. Osy qylmystyq isterde kúdikti adam retinde tanylǵandar joq, — dedi mınıstrdiń orynbasary.

Eske salsaq, bıyl maýsym aıynda Nazarbaev ýnıversıtetinde stýdent ólimine qatysty qylmystyq is qozǵaldy. 

Al tamyz aıynda boıjetken jataqhananyń 12 qabatynan sekirip ketti.