Astanada stýdentterdiń «Shabyt» ult aspaptar orkestriniń eseptik kontserti ótti

«Shabyt» ult aspaptar orkestri atalmysh ýnıversıtettiń 30-dan astam stýdentinen quralǵan, kórkemdik jetekshisi - Gaýhar Sarmantaeva. Olardyń repertýarynda qazaq jáne shet el kompozıtorlarynyń kóptegen týyndylary bar. Dombyra, sazsyrnaı, baıan, qobyz, shańqobyz, dańǵyra, daýylpaz jáne qońyraýly aspaptardyń úndesken únimen qazaqtyń kúı sandyǵynyń jaýharlary - Qazanǵaptyń «Qus qaıtarý», halyq kúıi «El aıyrylǵan», Daırabaıdyń «Daırabaı», Qurmanǵazynyń «Jıma» (jigitter ansambli), «Saryarqa» kúıleri jáne taǵy basqalary sondaı-aq, A.Andreevtiń «Fınskaıa polkasy», Motsarttyń «Rondasy», M.Ogınskııdiń «Polonezi» oryndaldy.

Sondaı-aq «Shabyt» orkestriniń súıemeldeýimen Astana qalasy fılarmonııasynyń ánshileri halyq jáne qazirgi kompozıtorlardyń ánderin oryndady.

Aıta keteıik, orkestr S.Seıfýllın atyndaǵy QazATÝ bazasynda 1967-shi jyldan beri jumys istep keledi. Orkestrdiń arqasynda osy ýaqytqa deıin talaı jas boıyndaǵy talabyn shyńdap, mýzyka ónerin kásibı deńgeıde meńgerip shyqty. 1985 jyly orkestrge «Halyq kórkemónerpazdary ujymy» ataýy berildi. «Shabyt» 2008 jyly Aqtóbe qalasynda ótken «Jubanov kóktemi» festıvaliniń jeńimpazy, 2010 jyly Astana qalasy Tilderdi damytý basqarmasy uıymdastyrǵan «Rýhanı qazyna» qalalyq ult aspaptar ansamblderi baıqaýynyń 1-shi oryn ıegeri.