Astanada stýdentterdiń «Qoǵam keshe jáne búgin!» atty respýblıkalyq fotokórmesi ashyldy

Qazaqstandyq talantty jastardyń basyn qosyp, sýretke túsirgendi jany qalaıtyn jandardyń fotokórmesin uıymdastyrǵan Respýblıkalyq pikirsaıysshylar qaýymdastyǵy men QR Mádenıet jáne aqparat mınıstrligi.

 Kórmege jalpy sany 14 jas fotograftyń 80-ge tarta  tyrnaqaldy eńbekteri usynyldy. Kópten beri josparlap júrgen jastar, bul ataýly kúndi asyǵa kútipti. Sondyqtan bolar, kórmege óz jumystaryn qoıýǵa ynta bildirgenderdiń sanynda esep bolmady. Jyldar boıy jınaǵan tájirıbelerimen bólisýde belsendilik tanytyp, kópshilik qaýymdy qýana qarsy alýǵa talpyndy. Qoǵamnyń búgingi sátterin túsirip, qalalardyń tyń beınelerine til bitirgen ónerpazdar ónerine jınalǵan kópshilik tánti boldy.

 «Bul fotokórmege astanalyq stýdenttermen qatar, Pavlodar, Óskemen, Qaraǵandy jáne eldiń basqa da óńirlerinen jas foto sheberlerin tartqan edik. Sýretke túsirý olardyń súıikti isi jáne osynda ilingen árbir jumysqa qarap, osy óner túrin tereń meńgergendigin kórýge bolady. Fotokórme - olardyń qoǵammen suhbaty dese bolady», - deıdi Respýblıkalyq pikirsaıysshylar qaýymdastyǵynyń atqarýshy dırektory Aınur Muqanova.

 «Qazirgi jastar foto, beınetúsirilimderdi jasaýdy unatady. Sondyqtan bizde osyndaı fotokórmeni ótkizý ıdeıasy týdy. Munda túrli janrlardaǵy týyndylar qoıylǵan. Fotosýretterdiń artqy tusynda avtordyń baılanys málimetteri bolady. Onymen tanysyp, baılanysqa shyǵamyn degen kez kelgen fotograf kórmedegi fotosýretterdi alyp kete alady», - deıdi ol.