Astanada stýdentterdi jataqxanalarda tirkeýdi suraýda
ASTANA. QazAqparat - L. Gýmılev atyndaǵy Eýrazııa ulttyq ýnıversıtetiniń oqytýshylary páter jaldap turatyn stýdentter nelikten jataqxanalarda tirkele almaıtyndyǵyn aıtyp narazy, dep xabarlaıdy QazAqparat.
«Páter jaldap turatyn stýdentter bizdiń jataqxanalarǵa tirkele alady ma? Eger sizder quqyqtyq tártipti maqsat tutsańyzdar, biz barlyq stýdentterdi tirkeýge alyp, quqyqtyq tártipti qamtamasyz ete alamyz. Dekandarǵa tapsyrma berip, kim qaıda turyp jatqanynan aqparat ala alamyz - biraq barlyq stýdentterdi bir jerge tirkeýge alsaq...» - dedi ýnıversıtet prorektory Dıxan Qamzabekuly ekstremızm men terrorızmge qarsy kúres máselesi boıynsha jańa normalardy túsindirýge arnalǵan otyrysta polıtseılerge qarata aıtqan sózinde.
«Stýdentter mindetti túrde turyp jatqan jerlerinde ǵana tirkelýi tıis. Eger jalǵa berýshi olardy tirkeı almasa, basqa páter izdegeni abzal», - dedi Astana qalasy ІІD kóshi-qon polıtsııasy basqarmasynyń podpolkovnıgi Qanat Dosmuxanbetov.
Bundaı jaýap oqytýshylardyń kelispeýshiligin týǵyzdy. Sebebi stýdentter endi páter jaǵalap júrýge májbúr bolady.
Jýrnalıstıka jáne saıasattaný fakýlteti dekanynyń orynbasary Gúljaýhar Dýlatovanyń aıtýynsha, EUÝ-da oqyp jatqan 17 myń stýdenttiń basym bóligi ózge óńirlerden kelgen. Jalpy JOO-da 11 390 stýdent jergilikti jerden emes. Onyń 4588-i stýdenttik jataqxanalarda ornalastyrylǵan. Óz kezeginde Seıfýllın atyndaǵy Agrotexnıkalyq ýnıversıtette 6266 stýdent shetten kelgen. Olardyń 2 myńy ǵana jataqxanalarmen qamtylǵan.
