Astanada stýdentter jataqhanadan oryndy mobıldik qosymsha arqyly suraı alady
«Astana Innovations» AQ málimetine sáıkes, osy jyly Smart Astana mobıldik qosymshasy túrli áleýmettik salada qala turǵyndaryn kerek aqparatpen qamtamasyz etetin bolady.
Máselen, 22 aqpannan bastap qosymshada salyq bereshegin tekserý múmkindigi paıda bolady.
Al 1 sáýirge deıin salyqtar men aıyppuldardy, úıirmeler men sektsııalar aqshasyn tóleý qyzmetteri qoljetimdi bolady.
15 naýryzǵa deıin HQKO-da aldyn ala kezek alý múmkindigi paıda bolady.
Tsıfrlyq tehnologııalar astanalyq bilim berý salasynda da belsendi engizilýde. Atap aıtqanda, 18 aqpanda Smart Astana mobıldik qosymshasynda bilim berý ortalyqtaryndaǵy sektsııalar men úıirmeler kestesi kórsetilgen jáne olarǵa jazylý múmkindigi bar fýnktsııa qosylady. Osylaısha, turǵyndar jumys istep turǵan jáne ashylyp jatqan bilim berý ortalyqtary týraly aqparatty bilip otyrady.
15 naýryzda barlyq memlekettik kolledjderdiń jataqhanasy sandyq júıege qosylady. Solaısha, jatyn oryn suraýǵa ótinishti onlaın berýge bolady.
Budan bólek, 1 sáýirde Smart Astana qosymshasynda balabaqshaǵa kezekke qoıý, mektepke barýǵa jazylý servısi iske qosylady.
Ár mekteptiń kireberisinde QR-kodtary bar aqparattyq taqtaıshalar jáne nusqaýlyqtar ornatylady. Servıs shaǵymdar men usynystardy qabyldaıtyn bolady.
Astanada «aqyldy» tehnologııalar qoǵamdyq kólik salasyna da engizilýde. Smart Astana mobıldik qosymshasynda qazirdiń ózinde «Avtobýs aıaldamasynyń tablosy» servısi qoljetimdi. Ol avtobýstyń qansha ýaqytta keletiniń kórsetedi. Servıs qyzmeti QR-kodty skanerleýmen júzege asady. QR-kodtardy barlyq aıaldamalarǵa qoıý oılastyrylǵan, ol barlyq aıaldamalardy vırtýaldy tablomen qamtýǵa múmkindik beredi.
Sonymen qatar naýryz aıynda taksı shaqyrý (Astana Taxi) servısi iske qosylady jáne onda jol quny kórsetilip turatyn bolady.