Astanada stýdentter zardap shekken jol apatynyń vıdeosy paıda boldy
ASTANA. QazAqparat - 23 naýryz kúni túnde Bógenbaı batyr dańǵyly men Beıbitshilik kóshesiniń qıylysynda oryn alǵan jol apatyna qatysty sotqa deıingi tergeý amaldary aıaqtalǵan joq, dep habarlaıdy QazAqparat.
«Qazirgi kezde atalǵan jol-kólik oqıǵasy boıynsha QR Qylmystyq kodeksiniń 345-babymen sotqa deıingi tergeý amaldary júrip jatyr. Osy rette tıisti saraptamalar taǵaıyndaldy. Jol apatynan qatty zardap shekken eki stýdent qyzdyń bireýi (Aıjan Qazbek) 1 sáýir kúni aýrýhanada kóz jumdy. Atap aıtqanda, búginde birneshe saraptama júrip jatyr. Sondyqtan osy baǵyttaǵy jumystar aıaqtalǵannan keıin, tıisti qorytyndy shyǵarylady»,-dedi elorda ІІD baspasóz qyzmetiniń jetekshisi Sofııa Qylyshbekova «QazAqparat» tilshisine bergen málimetinde.
Esterińizge sala keteıik, buǵan deıin jol apatyna baılanysty aýyr halde jatqan qyzdardyń jaqyndary astanalyqtardan qan tapsyrýdy ótingen bolatyn. Sonymen qatar stýdent qyzdardyń týystary sol apatty avtokóliktegi beınekamerasyna túsirip alǵandar bolsa, áleýmettik jelilerde kórsetilgen telefondarǵa habarlasýdy suraǵan edi .
Osy oraıda Erlan esimdi kýáger jol apaty bolǵan sátti túsirilgen vıdeony usynǵan eken. Kýágermen telefon arqyly baılanysqa shyǵyp, jol-kólik oqıǵasy týraly suraǵan bolatynbyz. «Beıne jazbadan barlyǵy kórinip tur ǵoı. Ekinshi kóliktiń qıylysqa qatty jyldamdyqpen kelgeni baıqalady»,-dedi ol.
