Astanada stýdentter emhanasynyń fılıaly ashyldy
ASTANA. 31 mamyr. QazAqparat - Búgin Astana qalasy Densaýlyq saqtaý basqarmasynyń basshysy Aıgúl Segizbaeva S. Seıfýllın atyndaǵy Qazaq agrotehnıkalyq ýnıversıtetiniń medıtsınalyq ortalyǵy bazasynda № 3 qalalyq emhananyń fılıalyn ashty.
Bul týraly elorda ákiminiń baspasóz qyzmetinen habarlandy.
Fılıaldyń 7 kabıneti bar jáne QazATÝ stýdentterine ambýlatorlyq-emhanalyq kómek kórsetý úshin 14 bilikti mamanmen jasaqtalǵan. Fılıaldyń ashylýy stýdentterge medıtsınalyq kómek kórsetý sapasy men qoljetimdiligin jaqsartýǵa, sondaı-aq, qaladaǵy 53 oqý ornynda oqıtyn 57 747 stýdentke (onyń ishinde 14%-y QazATÝ stýdentteri) medıtsınalyq qyzmet kórsetetin № 3 qalalyq emhananyń júktemesin aıtarlyqtaı azaıtýǵa múmkindik beredi.
Fılıal S. Seıfýllın atyndaǵy Qazaq agrotehnıkalyq ýnıversıtetiniń aýmaǵynda 2012 jyldan beri jumys jasap kele jatqan medıtsınalyq ortalyq bazasynda ornalasqan. Ýnıversıtet aýdany 220 m2 bolatyn orynjaıdy 8 248 stýdentke qyzmet kórsetetin 3 terapevtik ýchastok ornalastyrý úshin tegin usynyp otyr.
Medıtsına qyzmetkerleri profılaktıkalyq jáne terapevtik tekserýler, sondaı-aq, fýnktsıonaldyq dıagnostıkalyq qyzmetter kórsetedi. Budan ózge áleýmettik qyzmetkerler jáne psıhologtar stýdentterge aýrýdyń aldyn alý jáne salaýatty ómir saltyn nasıhattaý boıynsha keńes berip, trenıngter ótkizip, saýalnamalar júrgizedi.
Fılıal 2013 jyldyń 20 naýryzynda S. Seıfýllın atyndaǵy Qazaq agrotehnıkalyq ýnıversıteti men Astana qalasy ákimdigi arasynda qol qoıylǵan Yntymaqtastyq týraly memorandým aıasynda ashylyp otyr.
Atalǵan memorandýmnyń maqsaty - stýdentterge ambýlatorlyq-emhanalyq medıtsınalyq kómek kórsetý sapasy men qoljetimdilikti jáne qyzmet kórsetýdi jaqsartý, sondaı-aq, árbir stýdenttiń ómirine profılaktıkalyq saýyqtyrý sharalaryn endirý bolyp tabylady.
