Astanada stýdentter arasynda respýblıkalyq aıtys ótedi
ASTANA. QazAqparat - Búgin Lev Gýmılev atyndaǵy Eýrazııa ulttyq ýnıversıtetinde stýdentter arasynda respýblıkalyq aıtys ótedi. Atalǵan shara «Astana kóktemi» onkúndigi aıasynda uıymdastyrylady, dep habarlaıdy QazAqparat tilshisi ýnıversıtettiń baspasóz qyzmetine silteme jasap.
«Aıtysqa Muhtar Nııazov, Meıirbek Sultanhan syndy elimizge tanymal aıtyskerlermen qosa Qyzylorda, Aqtóbe, Almaty, Qaraǵandy qalalarynyń stýdent aqyndary qatysady. Qazylar alqasy: aqyn, pýblıtsıst Júrsin Erman, kúıshi-jyraý Almas Almatov, kásipker, qoǵam qaıratkeri Oralbek Botpaı, aıtysker aqyn Dáýletkereı Kápuly men aqyn Qalqaman Sarın», - delingen resmı habarlamada.
Shara maqsaty: Ultymyzdyń rýhanı murasy - aıtys ónerin nasıhattaý. Sondaı-aq Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasyn negizge ala otyryp jastardyń ulttyq sanasyn, olardyń boıynda otansúıgishtik sezimdi qalyptastyrý máselesi aıtystyń arqaýyna aınalmaq.
Aıta keteıik, aıtys ýnıversıtettiń oqý-zerthanalyq ǵımaratynyń kontsert zalynda (Munaıtpasov kóshesi, 11) ótedi. Bastalýy - 16:00.
