Astanada stýdentter arasynda bokstan VI jazǵy ýnıversıada bastaldy
ASTANA. 20 sáýir. QazAqparat /Jasulan Amanbaıuly/ - Astanada Táýelsizdiktiń 20 jyldyǵyna arnalǵan joǵary oqý oryndarynyń stýdentteri arasynda bokstan VI jazǵy ýnıversıada bastaldy.
Bıyl elordadaǵy S.Seıfýllın atyndaǵy Qazaq agrotehnıkalyq ýnıversıteti bul dodany ótkizý mártebesine ıe bolyp otyr.
S.Seıfýllın atyndaǵy Qazaq agrotehnıkalyq ýnıversıtetiniń rektory Aıtbaı Bulashevtiń aıtýynsha, boks týrnıri 30-ǵa tarta sport túrinen ótip jatqan respýblıkalyq ýnıversıadanyń aıasynda uıymdastyrylyp otyr.
«Jarysta 4 kún boıy eldiń 30-ǵa tarta ýnıversıtetterinen kelgen 165-ten astam boksshy baqtaryn synaıdy. Men osy týrnır nátıjesinde bokstyń jańa esimderi shyǵatynyna kúmándanbaımyn»,-deıdi ýnıversıtet rektory.
Boks dodasyna Astana, Almaty, Taraz, Shymkent, Qaraǵandy, Qyzylorda, Pavlodar, Qostanaı, Aqtóbe, Petropavl, Semeı, Óskemen qalalarynan komandalar kelgen.
«Búgin jeńilgender bolmaıdy, barlyq boksshylar, jankúıerler, qazaqstandyqtar utysta bolady. Sebebi osyndaı dodalar arqyly biz salamatty ómir saltyn nasıhattap, jastar arasynda úlken sporttyń bedelin arttyramyz», - dep atap kórsetti ol.
