Astanada strıtboldan álem chempıonatynyń qorytyndysy shyǵaryldy
ASTANA. QazAqparat - Jeksenbi kúni «Astana Opera» teatrynyń janyndaǵy alańda kóshe basketbolynan Álem chempıonatynyń aqtyq jarystary ótti. Birneshe kún boıy strıtboldan Álem birinshiliginde 20 erler jáne 20 áıelder komandasy ózara sheberlik baıqasty. Erler arasynda katarlyq, áıelder arasynda frantsýz komandasy kósh bastady.
Shırek fınalda erler arasynda Slovenııa-Brazılııa, Italııa-Grýzııa, Argentına-Katar jáne Jańa Zelandııa-Ýrýgvaı komandalary kezdesti. Jartylaı fınalǵa Brazılııa, Italııa, Katar jáne Jańa Zelandııa quramalary ótti. Katar jańazelandııalyq komandany aıqyn basymdyqpen jeńip, fınalǵa joldama alyp, aqtyq saıysta týrnırdiń favorıtteri atana almaǵan, biraq tartysty oıyn kórsetken Brazılııa komandasymen kúsh synasty. Jartylaı fınalda brazılııalyqtar eki aıyppul dobyn dóp tıgizip, Italııa komandasyn bir upaı basymdyqpen jeńip shyqty. Sheshýshi kezdesýde 20:12 esebimen katarlyqtar top jardy, al Italııa quramasy chempıonattyń qola júldegeri atandy, dep habarlaıdy elorda ákńimdiginiń resmı saıty.
Aıta keteıik, dál osy Katar quramasy sheshýshi oıynda Qazaqstanǵa shırek fınalǵa shyǵýǵa múmkindik bermedi.
Áıelder arasyndaǵy oıyndar da qyzyqty ótti. Shırek fınalda Vengrııa-Ispanııa, Frantsııa-Nıderlandy, AQSh-Qytaı, Jańa Zelandııa-Chehııa quramalary kezdesti. Jartylaı fınalǵa Ispanııa, Frantsııa, AQSh jáne Chehııa komandalary ótti. AQSh quramasy týrnırdiń sózsiz favorıtteri atanyp, fınalǵa shyqty. Ispanııa-Frantsııa komandalary arasyndaǵy jekpe-jek bir upaı aıyrmashylyqpen frantsýzdardyń paıdasyna sheshildi. Frantsııa men AQSh komandalarynyń aqtyq kezdesýinde frantsýz sportshylary 21-12 esebimen jeńip shyqty. Úshinshi oryn úshin bolǵan oıynda ıspandyqtar Chehııa komandasynan basym tústi.
FIBA Halyqaralyq basketbol federatsııasynyń ókilderi Qazaqstannyń astanasynda ótken Álem chempıonatyna joǵary baǵa berip, uıymdastyrýshylardyń da, sportshylardyń da, Álem birinshiliginiń translıatsııasyn ǵalamtordan tamashalaǵandardyń da senimin aqtaǵanyn atap ótti.
Eske salaıyq, Álem chempıonatynyń kezdesýleri 3h3 formatynda ótti, oǵan álemniń 30 memleketinen 200-ge jýyq sportshy qatysty.
