Astanada strıtboldan Álem chempıonaty bastaldy
ASTANA. QazAqparat - Astanada kóshe basketbolynan erler men áıelder komandalarynyń arasynda álem birinshiligi ótip jatyr. Strıtboldan «Astana Opera» teatrynyń aldyndaǵy ashyq alańdaǵy 3x3 formatyndaǵy kezdesýler 5 maýsymǵa deıin jalǵasady. Bul týraly elorda ákimdiginiń resmı saıtynda habarlady.
Halyqaralyq basketbol federatsııasynyń (FIBA) basqarýshy dırektory Aleks Sanchestiń atap ótýinshe, Álem birinshiligin ótkizý úshin Qazaqstannyń tańdalýy kezdeısoq emes. Strıtboldy barsha álemde, sonyń ishinde bizdiń de elimizde damytý kózdelgen. Onyń aıtýynsha, arnaıy týrnır úshin doptyń jańa túri jasaldy, ol jabynymen jáne ólshemimen erekshelenedi.
«2015 jyly Qazaqstan týrnırdi ótkizý mártebesine ıe boldy. Búginde álemniń túkpir-túkpirinen kelgen 200-den astam oıynshyny kórip otyrmyz. Balalar úshin arnaıy oıyn alańdaryn saldyq, 8-10 jastaǵy balalar strıtbolǵa áýes bolady, biz úshin osyndaı kóshe mádenıetiniń uıymdasqan jáne belgili bir baǵytta damyǵany, salaýatty ómir saltyn ustaný mańyzdy», - dedi Qazaqstannyń strıtbol lıgasynyń vıtse-prezıdenti Ashat Aǵybaev.
Elordada erler men áıelder quramalary bas júldeni sarapqa salýda. Jarys tórt topta ótkiziledi. Búgin erler komandasy Rýmynııa quramasymen alǵashqy oıynyn ótkizedi. Al áıelder Nıderlandy komandasymen sheberlik baıqasady.
Astanada ótip jatqan álemdik dodaǵa Jańa Zelandııadan ótken jylǵy úzdik oıynshy Taı Vınıard ta keldi.
«Osynda qaıtyp kelý men úshin úlken qurmet, aınaladaǵynyń bári keremet, qala jaqsy damyp keledi. Shyn máninde, barlyq komandalar da myqty, biraq Avstrııa, ıspan komandalaryn erekshe atap ótpekpin, olar kúshti, bir topty bólip aıtý qıyn. Osynda bolǵanyma qýanyshtymyn, menińshe, bul tamasha birlesken jumys bolady», - dep sportshy óz oıymen bólisti.
Chempıonatqa kelýshiler qyzyqty oıyn-saýyq baǵdarlamasyn tamashalaıdy. Úlken aýmaqta basketboldan jáne strıtvorkaýttan sheberlik synyptary ótkiziledi, alǵash ret frıstaılerler men ushatyn basketbolshy-akrobattar óner kórsetedi.
Aıta keteıik, osy kúnderi jappaı kóshe týrnırleri, sonyń ishinde Astana kýbogy da uıymdastyrylady, oǵan 10 jastan asqandar qatysa alady.
