Astanada Strıt Ýorkaýttan alǵash ótken álem chempıonatynda jerlesimiz Dıas Bıdjıev top jardy (FOTO)
ASTANA. QazAqparat - QR Tuńǵysh Prezıdenti kúni merekesi aıasynda Elorda tórindegi «Saryarqa» respýblıkalyq velotreginde Strıt Ýorkaýttan alǵash álem chempıonaty-festıvali ótti. Sharaǵa 75 eldiń eń myqty sportyshylary qatysyp, óz ónerlerin ortaǵa saldy.
Nátıjesinde qazaq eliniń namysyn qorǵaǵan jerlesimiz Dıas Bıdjıev bas júldeni jeńip aldy. Al 2-shi orynǵa reseılik Valerıı Kışenko jaıǵassa, úzdik úshtikke ýkraınalyq Mıhaıl Grekov qol jetkizdi. Strıt Ýorkaýt sporty beltemir, qyrly bóreneler syndy qarapaıym sport quraldarynda óner kórsetetin sport túri. Onda sportshylar qaıtalanbas, jurt tamsanarlyq ónerlerimen jankúıerlerin tánti etti. QR Tuńǵysh Prezıdenti kúni merekesine oraı uıymdastyrylǵan sharaǵa AQSh-tan osy «kóshe jattyǵýlarynyń» negizin qalaýshy Gennıbal Kıng, Ýkraınadan Denıs Mının arnaıy keldi.
Sporttyń bul túrin bireý bilse, bireý bile bermeıdi. Sondyqtan Street Workout sporty týraly qysqasha toqtalyp óteıik. Sporttyń bul túriniń paıda bolǵanyna kóp ýaqyt bola qoıǵan joq. Alǵash ret qurlyqtyń arǵy betinde Amerıka Qurama Shtattarynda dúnıege keldi.
Tarıhy tym tereńde bolmasa da, atalmysh sport túri qysqa ǵana ýaqyt aralyǵynda elimizde de keńinen etek alyp, resmı túrde buqaralyq sport túri bolyp tanyldy. Sport túrine degen jastardyń qyzyǵýshylyǵynyń arqasynda arnaıy federatsııa da quryldy.
Bul sport túriniń basty ereksheligi - asa bir shyǵyndy talap etpeıdi. Kez-kelgen ýaqytta, kez-kelgen sport alańdarynda, tipti qala ortalyqtarynda, kóshelerde, saıabaqtarda da shuǵyldana berýge bolady. Bir sózben aıtqanda, óte qoljetimdi sport túri. Taǵy bir ereksheligi - tándi shynyqtyryp, jandy tynyqtyryp qana qoımaı, qatań tártipke baýlıdy, rýhty shyńdaıdy, jańa jetistikke jigerlendire otyryp, bıik maqsattarǵa jeteleıdi. Jáne bastysy - adamnyń ózin-ózi jetildirýinde aıtarlyqtaı septigin tıgizedi.
Búgingi tańda elimizde sporttyń bul túrimen aınalysatyn jastardyń qatary kúnnen kúnge artyp keledi. Mundaı álemdik saıystyń Qazaqstanda ótýi de tegin emes. Bul elimizde meıli, qaı sport túri bolsa da, asa joǵary qarqynmen damyp kele jatqandyǵynyń belgisi.
Shyndyǵynda, kez-kelgen jandy salaýatty ómir saltyn ustanýǵa shaqyratyn bul sharanyń mán-mańyzy zor.
Aıta ketelik, Strıt Vorkaýttan álem birinshiliginde Qazaq eliniń atynan Dııas Bıdjıev óner kórsetti.
Sharany Qazaqstan Respýblıkasynyń Mádenıet jáne sport mınıstrligi, Astana qalasynyń ákimdigi, Qazaqstan Respýblıkasynyń «Street Workoot Street Lifting» federatsııasy, halyqaralyq «Street Workoot Street Lifting» federatsııasy uıymdastyrdy.
Kúncultan Otarbaev
