Astanada stendtik atýdan el kýbogy sarapqa salynady
ASTANA. 31 shilde. QazAqparat - Astanada 1-5 tamyz aralyǵynda stendtik atýdan Qazaqstan Respýblıkasy Kýbogynyń úshinshi kezeńi ótedi. Bul týraly QR Sport jáne dene shynyqtyrý agenttiginiń baspasóz qyzmetinen habarlandy.
Agenttik málimetterine qaraǵanda, Qazaqstannyń mergenderi respýblıkalyq týrnırdiń bas júldesin sarapqa salyp, jarysqa Astana qalasy Almaty, Qyzylorda, Ońtústik Qazaqstan oblysynan, Qostanaı jáne Pavlodar qalasynyń 100-ge jýyq sportshysy qatysady.
1 tamyzda Kýboktyń kezekti kezeńi bastalady. Doda 15 jastan joǵary jasóspirimderdiń jáne eresek erler men áıelder arasynda ótedi. Mergender eki jattyǵý - dóńgelek stend jáne kompakt-sportıng boıynsha baq synasady. Jarystyń saltanatty ashylý rásimi 2 tamyzda ótedi. Stendtik atýdan QR kýbogynyń nátıjeleri 4 tamyzda belgili bolady.
«Bıyl Kýbokpen birge Astana qalasynyń ashyq chempıonaty uıymdastyrylady. Kýboktyń birinshi kezeńi Shymkentte «Eldorado» atys ornynda dóńgelek jáne transheıalyq stend boıynsha ótken edi. Jalpy komandalyq esepte Ońtústik Qazaqstan oblysynyń quramasy kósh bastady. Ekinshi orynda Almaty komandasy. Úzdik úshtikti elordalyqtar tuıyqtady. Kýboktyń ekinshi kezeńi eńbegi sińgen sport sheberi Aleksandr Asanovqa arnalǵan stendtik atýdan halyqaralyq týrnırdi ótkizýmen sáıkes keldi» delingen baspasóz baıanynda.
