Astanada stendap-komık Ǵalym Qalıaqbarovtyń kontserti toqtatyldy: ákimdik túsinikteme berdi
ASTANA. KAZINFORM – Astanada Esil aýdany ákimdiginiń qyzmetkerleri stendap-komık Ǵalym Qalıaqbarovtyń kontsertin toqtatty. Oǵan uıymdastyrýshylardyń is-shara ótetini týraly jergilikti bılikke aldyn ala habarlamaýy sebep bolǵan.
Kontsert 19 tamyz kúni keshke elordadaǵy oıyn-saýyq oryndarynyń birinde ótken. Qalıaqbarov óner kórsetip jatqanda memlekettik organ ókilderi kelip, kontsertti toqtatýdy suraǵan. Sondaı-aq mán-jaıdy túsindirý úshin ózderimen birge júrýdi ótingen.
Esil aýdanynyń ákimdigi kontserttiń ne sebepti toqtatylǵanyn túsindirdi. Ákimdik málimetinshe, uıymdastyrýshylar is-shara ótetini týraly mindetti habarlamany 10 kún buryn jiberýge tıis bolǵan. Alaıda mundaı habarlama berilmegen. Sondyqtan is-sharany ótkizý resmı túrde kelisilmegen.
– Ákimdik ókilderi zań talaptary men qonaqtardyń qaýipsizdigin qamtamasyz etý tártibin túsindirý úshin oqıǵa ornyna bardy. Alaıda uıymdastyrýshylar qyzmetkerlerdiń mekeme aýmaǵyna kirýine kedergi keltirdi. Osyǵan baılanysty Esil aýdanynyń Polıtsııa basqarmasynda uıymdastyrýshylarmen profılaktıkalyq áńgime júrgizildi. Olarǵa zań talaptary men kelisilmegen buqaralyq is-sharalardy ótkizýdiń yqtımal qaýipteri jan-jaqty túsindirildi. Áńgime aıaqtalǵannan keıin uıymdastyrýshylar jiberildi, – dep túsindirdi ákimdiktiń baspasóz qyzmeti.
Ákimdik mádenı-buqaralyq is-shara ótetini týraly jergilikti bılikke aldyn ala habarlaý eń aldymen azamattardyń qaýipsizdigin qamtamasyz etý úshin qajet ekenin atap ótti. Mundaı jaǵdaıda tótenshe jaǵdaı týyndasa, jedel qyzmetterdiń jumysyn der kezinde úılestirip, kelýshilerdiń ómiri men densaýlyǵyn qorǵaýǵa múmkindik bar.
Astanadaǵy jaǵdaıdan keıin Ǵalym Qalıaqbarovtyń 21 tamyzda Almatyda ótýge tıis kontserti de toqtatylǵany belgili boldy. Uıymdastyrýshylar is-sharanyń «ózderine baılanysty emes sebeptermen» ótpeıtinin habarlap, kórermenderge bılet quny tolyq qaıtarylatynyn málimdedi.
Aıta keteıik, buǵan deıin elordadaǵy oıyn-saýyq oryndarynyń birinde kelýshiler arasynda janjal shyǵyp, saldarynan bir adam kóz jumǵan edi. Osy is boıynsha kináliler 8,5 jáne 9 jylǵa bas bostandyǵynan aıyryldy.
