Astanada STEM-olımpıadasyna 7 elden 250-den asa adam qatysyp jatyr
ASTANA. KAZINFORM — Astanada jyldyń eń aýqymdy bilim berý is-sharalarynyń biri — «Bilimdegi ınnovatsııalar» halyqaralyq STEM-olımpıadasy jáne Halyqaralyq robottar shaıqasy bastaldy, dep habarlaıdy elorda ákimdiginiń resmı saıty.
Mundaı deńgeıdegi is-sharalar Qazaqstannyń zamanaýı bilim berý úrdisterine belsendi qatysýshy memleket retindegi halyqaralyq bedelin nyǵaıtady. Olımpıada 22-24 qarasha aralyǵynda ótedi. Oǵan Qazaqstan, Ózbekstan, Qyrǵyzstan, Reseı, Túrkııa, Úndistan jáne Mońǵolııa elderinen 250-den astam qatysýshy jınaldy. Úsh kún boıy mektep oqýshylary robototehnıka, baǵdarlamalaý, ınjenerııa jáne 3D-modeldeý baǵyttary boıynsha óz jobalaryn tanystyrady.
Sondaı-aq STEM pánderiniń ustazdary úshin jeke kásibı olımpıada uıymdastyrylǵan.
Qatysýshylardyń jumystaryn ınjenerler, baǵdarlamashylar jáne álemdik tehnologııalyq chempıonattardyń jeńimpazdary qatarynan quralǵan halyqaralyq sarapshylar baǵalaıdy.
Jeńimpazdardy dıplomdar, medaldar jáne seriktesterdiń arnaıy syılyqtary kútedi.
Astana qalasynyń Tsıfrlandyrý jáne memlekettik qyzmetter basqarmasynyń basshysy Berik Ahmetovtiń aıtýynsha, mektep oqýshylarynyń tehnologııalyq baǵyttarǵa qyzyǵýshylyǵy asa mańyzdy ról atqarady.
— Olımpıadanyń jyl saıyn keńeıýi — biz úshin qýanysh. Óıtkeni qala adamı kapıtaldy damytýǵa múddeli. Bizdiń oqýshylar — Astananyń bolashaǵyna oń áser etetin ınnovatsııalyq sheshimderdiń negizi, — dedi ol.
Bıylǵy olımpıada Astana IT salasyndaǵy jańa múmkindikterdiń tanystyrylymyna da alań boldy. Ahmetovtiń aıtýynsha, Astanada jas mamandar úshin ınfraqurylym men qolaıly jaǵdaılar belsendi damyp keledi.
— Balalar ınjenerııa, robototehnıka jáne ınformatıka baǵyttaryna den qoıa alatyndaı orta qalyptastyryp jatyrmyz. Qalada Halyqaralyq jasandy ıntellekt ortalyǵy ashyldy, endi AI Lab iske qosylady. Bul jerde oqýshylar men stýdentter naqty qalalyq jobalarmen aınalysa alady.Úzdik ıdeıalar qalalyq servısterge engizilýi úshin qoldaý alady, — dedi ol.
Іs-shara Astana ákimdigi, «Astana Innovations» AQ, «Daryn» ulttyq ortalyǵy, «Astana daryny» ortalyǵy, qalalyq bilim basqarmasy jáne «STEM Academia» tarapynan uıymdastyryldy. Olımpıada qatysýshylarǵa halyqaralyq saraptama, jańa kásibı baılanystar jáne sheteldik jarystarǵa joldama alý múmkindigin beredi.
STEM Academia jetekshisi Zalqarbek Muratáliuly olımpıadanyń turaqty dástúrge aınalǵanyn atap ótti.
— Biz STEM-olımpıadany onynshy jyl qatarynan ótkizip otyrmyz. Ár jyly balalardyń tehnıkalyq mamandyqtarǵa qyzyǵýshylyǵy artyp keledi. STEM bolashaq ınjenerlerdi daıyndaýdyń tıimdi tásili. Ásirese bıyl alys shetelden de qatysýshylardyń kelýi — básekeni kúsheıtip, jarystyń deńgeıin jańa satyǵa kóterdi. Barlyq qatysýshy óz qabiletin kórsetýge tyrysady dep senemin. Jeńimpazdarǵa sheteldegi halyqaralyq STEM-olımpıadaǵa qatysý múmkindigi beriledi, bul álemdik deńgeıde ózin tanytýǵa úlken múmkindik, — dedi ol.
Qatysýshylar da is-sharanyń atmosferasy erekshe kóńil kúı syılaıtynyn aıtady.
— Astanada bizdi óte jyly qarsy aldy. Uıymdastyrý deńgeıi joǵary. Mundaı aýqymdy sharada túrli elden kelgen oqýshylarmen básekelesý — biz úshin úlken tájirıbe. Bar kúshimizdi salyp, úzdik nátıje kórsetýge tyrysamyz, — dedi Ózbekstannan kelgen Mýhammadrasýl esimdi qatysýshy.
Halyqaralyq STEM-olımpıada men Robottar shaıqasynyń basty maqsaty — ınjenerlik oılaýdy damytý, tehnıkalyq mamandyqtardy tanymal etý jáne bilim berý salasyndaǵy halyqaralyq yntymaqtastyqty keńeıtý.
24 qarashada Nazarbaev Ýnıversıtetinde ótetin fınalda salmaǵy 15 kılogrammǵa deıingi «jaýynger» robottar kúsh synasqan sheshýshi jarys ótedi.
Budan buryn qazaqstandyq oqýshylar Halyqaralyq olımpıadada segiz medal jeńip alǵanyn jazǵan edik.