Astanada startaptarǵa arnalǵan Astana Hub Battle jarysy ótedi
NUR-SULTAN. QazAqparat – Astanada tehnologııalyq startaptarǵa arnalǵan Astana Hub Battle jarysy ótedi, dep habarlaıdy QazAqparat.
Baıqaýǵa ótinishit Digital Bridge forýmynyń saıtynda 15 qazanǵa deıin qabyldaıdy.
«Astana Hub Battle jarysy 2019 jyldyń 24-25 qazanynda «Digital Bridge» halyqaralyq tehnologııalyq forýmy aıasynda ótedi. Іs-sharanyń basty maqsaty – úzdik tehnologııalyq startap-jobalardy anyqtaý jáne olardy damytý úshin aqshalaı syılyqtarmen marapattaý», delingen habarlamada.
Astana Hub Battle-ǵa qatysý úshin startap ıelerinde MVP nemese MVO satysyndaǵy joba, sondaı-aq komandanyń keminde eki qatysýshysy bolýy tıis. Birinshi kezeńde ótinim irikteledi, ekinshi kezeń - jartylaı fınalda jobalar tanystyrylady, al sońǵy kezeń, ıaǵnı fınalǵa 10 startap-joba ótedi.
Astana Hub Battle júlde qory – 30 000 AQSh dollaryn quraıdy, birinshi orynǵa — 15 000, ekinshi oryn — 10 000, úshinshi oryn — 5 000 dollar.
Aıta keteıik, ótken jyly Astana Hub Battle jarysynda birinshi oryndy avtomobılden shyqpaı janarmaı quıýǵa jáne tólem jasaýǵa múmkindik beretin júrgizýshii men janarmaı stansasy ıelerine arnalǵan Smart Gas servısi, ekinshi oryndy veb-saıttardy monıtorıngileý jáne qorǵaý boıynsha keshendi sheshimder ázirleıtin WebTotem startap-jobasy, úshinshi oryndy kontragentterdiń adaldyǵyn tekseretin Kompra servısi ıelengen bolatyn.
Astana Hub baspasóz qyzmetiniń málimetinshe, jarystyń jartylaı fınalyna ótken startaptar «Digital Bridge» forýmy aıasynda ótetin «Startap alleıa» kórmesinde áleýetti ınvestorlar aldynda óz jobasyn usynýǵa biregeı múmkindik alady.
Qatysýshylardy irikteýdiń talaptary, sondaı-aq jobalardyń basym baǵyttary týraly www.battle.astanahub.com saıtynan bilýge bolady.
Esterińizge sala keteıik, 24-25 qazanda astanada «Digital Bridge» halyqaralyq tehnologııalyq forýmy ótedi. Bul – ІT-qaýymdastyq úshin Qazaqstandaǵy eń aýqymdy oqıǵa.
«Digital Bridge» forýmy 2018 jyldan beri ótkizilip keledi. Іs-sharanyń negizgi maqsaty – sandyq damý salasynda ınnovatsııalyq sheshimder men tájirıbe almasý úshin dıalog alańyn uıymdastyrý.
Forýmǵa startaptar, IT-kompanııalar, sarapshylar, ınvestorlar, bıznesmender, jýrnalıster, sondaı-aq memlekettik jáne korporatıvtik sektorlardyń ókilderi qatysady.
