Astanada stalınızm qurbandarynyń kórmesi ótýde
ASTANA. 29 mamyr. QazAqparat - Búgin Astanadaǵy Qazirgi zamanǵy óner murajaıynda «Men qazaqpyn! Myń ólip, myń tirilgen» atty kórme ashyldy.
Shara asharshylyq jáne saıası qýǵyn-súrgin qurbandaryn eske alý kúnine oraı ótkizilýde. Oǵan totalıtarlyq rejım tusynda qýǵyn-súrginge ushyraǵan jáne ashtyq jyldarynda jetim qalǵan sýretshilerdiń 20-ǵa tarta tól týyndylary usynylyp otyr. Olardyń qatarynda ózderiniń qıyndyqqa toly ǵumyrlaryna qaramastan, qazaq eli men jerin qyl qalamdarymen «jyrlap ótken» Abram Cherkasskıı, Valentın Antoşenko-Olenev, Alekseı Bortnıkov, Pavel Zaltsman, Qanapııa Teljanov, Janataı Shárdenov syndy óner ıeleriniń týyndylary bar.
«Ashtyq jyldary zardap shekken aımaqtardyń biri - soltústik Qazaqstan óńirileri. Eger Ýkraınada 84 paıyz halyq japa shekse, bizdiń elde - 72 paıyz adam ashtyqqa uryndy, árbir ekinshi adam kóz jumdy. Saıası qýǵyn-súrgindi nemese ashtyqty bastan keship kórmegen otbasy bolǵan joq. Kórme sol adamdarǵa arnalady», - deıdi QazAqparat tilshisine bergen suhbatynda murajaıdyń ǵylymı-aǵartý tobynyń jetekshisi Dámetken Bekova.
Bıyl asharshylyq náýbetine 80 jyl jáne stalınızmniń saıası qýǵyn-súrginine 75 jyl tolyp otyr. Osy kúni barsha Qazaq jurty totalıtarlyq rejımniń qurbandaryn eske alýda. Bul zulmattyń orny eshqashan tolmaıdy. Ashtyq jyldary Qazaqstanda 1,5 mln adam qyryldy. Kóbi 1937-1938 jyldary bolǵan qýǵyn-súrgin barysynda atyldy. Tek 1926-1939 jyldar aralyǵynda halqymyzdyń sany 867 340 adamǵa azaıdy. Qazaqtardyń sany 1926 jylǵy deńgeıge 1970 jyly ǵana jetti.
