Astanada sporttyq pokerden týrnır ótkizýdi jeleý etip, kazıno uıymdastyrǵan azamat 200 saǵatqa qoǵamdyq jumysqa jegildi
ASTANA. 19 sáýir. QazAqparat - «Astanadaǵy ıntellektýaldyq-sporttyq poker federatsııasy» fılıalynyń ákimshisi azamat Nuǵmanov 200 saǵat qoǵamdyq jumystarǵa sottaldy.
Ol sporttyq poker boıynsha týrnır ótkizemin degen jeleýmen kazıno qyzmetin uıymdastyrǵan. Bul týraly búgin QR Ekonomıkalyq qylmysqa jáne sybaılas jemqorlyqqa qarsy kúres agenttiginde ótken brıfıng barysynda resmı ókili Murat Jumanbaı málim etti.
Resmı ókildiń aıtýynsha, «Astanadaǵy ıntellektýaldyq-sporttyq poker federatsııasy» fılıaly ákimshisi uıymdastyrǵan poker zalynda 1,4 mln.teńge jáne 400 AQSh dollary somasynda aqsha qarajaty alyndy.
«Jalpy, Qarjy polıtsııasymen sporttyq poker birlestikteri atyn jamylyp jumys istegen 23 zańsyz oıyn mekemeleriniń qyzmeti anyqtaldy. Máselen, Almatyda «Galıanos» poker klýbynyń zańsyz qyzmeti toqtatyldy. Onda sporttyq poker boıynsha týrnır ótkizýdiń ornyna zańsyz oıyn bıznesi júzege asyrylǵan. Klýb ıegeri ákimshilik jaýapkershilikke tartyldy», - deıdi M. Jumanbaı.
