Astanada sportshylarǵa arnalǵan Medıtsına ortalyǵy ashyldy

NUR-SULTAN. QazAqparat - Nur-Sultanda sportshylarǵa arnalǵan Medıtsına ortalyǵy ashyldy. Bul týraly elorda ákimi Altaı Kólginov Instagram-paraqshasynda málim etti, dep habarlaıdy QazAqparat.

«Elordada sportshylarǵa arnalǵan alǵashqy Medıtsına ortalyǵy ashyldy. Jattyqtyrýshylar men sportshylarǵa arnap jeke medıtsınalyq mekeme bólý máselesi kezdesýlerimizdiń birinde talqylanǵan bolatyn.

Máselen osyǵan deıin sportshylarymyz №5 qalalyq emhana bazasynda kásibı tekseristen ótip, em alyp keldi. Bul tekserýler ózge patsıenttermen birge, jalpy kezek boıynsha júrgizildi. Al bul belgili bir deńgeıde yńǵaısyzdyq týǵyzyp, sportshylardyń sapaly daıyndyǵy men saýyqtyrý protsesine keri áser etti. Onymen qosa, sportshylar men olardyń jattyqtyrýshylary em-dommen arnaıy sport dárigerleri aınalysýy qajettigin aıtqan bolatyn», - dedi qala basshysy.

A.Kólginov atap ótkendeı, sala mamandarymen kezdesýden soń sportshylarǵa arnalǵan Medıtsına ortalyǵyn ashý sheshilgen. Nysan A-82 kóshesindegi «Nurly jol» temirjol vokzalynyń janynda ornalasqan.

«Bul ortalyq sportshylardyń medıtsınalyq tekserýden emin-erkin ótýine, densaýlyǵyn ońaltyp, qalpyna kelýine múmkindik beredi», - dedi astana basshysy.

Mekemege bilikti sport dárigerleri jumyldyrylatyn bolady.

Foto: instagram.com/altay_kulginov_official