Astanada sport sektsııalaryna kelesi jyly qansha qarajat bólinedi
ASTANA. QazAqparat – Bıyl elorda bıýdjetinen balalar sportyna bas-aıaǵy 5,6 mlrd teńge qarjy bólindi. Bul týraly Astana qalasy dene shynyqtyrý jáne sport basqarmasy basshysynyń mindetin atqarýshy Erkeǵalı Kárbozov málim etti, dep habarlaıdy QazAqparat tilshisi.
«Búginde Astanada memlekettik tapsyrys boıynsha sporttyń 25 túrinen 575 sporttyq sektsııa jumys istep tur. Jyl basynda berilgen vaýcherler sany 44 998 bolsa, onyń ishinde belsendisi 27 369 vaýcher. Ótken jyly sport baǵdarlamasyna 602 mln teńge bólinse, bıyl qarqyn alyp, 1,3 mlrd teńgege jetti. Sonymen qatar bıýdjetti naqtylaý kezinde máslıhat depýtattarynyń qoldaýymen qosymsha qarajat bólindi. Osylaısha jergilikti bıýdjetten bas-aıaǵy 5,6 mlrd teńge qarjy bólindi», - dedi Erkeǵalı Kárbozov elorda máslıhatynyń otyrysynda.
Onyń aıtýynsha, taıaýda sport sektsııalaryna Úkimet rezervinen qosymsha 660 mln 201 myń teńge qarjy bólindi.
«Kelesi jylǵa bıýdjet lımıti boıynsha 2 mlrd teńge qarastyrylyp otyr. Problemalarǵa kelsek, biz joǵaryda atalǵan 575 sporttyq sektsııanyń bárin baryp, qarap úlgermedik. Óıtkeni bizde monıtorıng júrgizetin quzyret joq. Biz atalǵan jaıt boıynsha Qoǵamdyq keńespen birlesip jumys jasaýǵa tyrystyq. Ázirge másele óz sheshimin tappaı tur. Sport sektsııasyna barǵan balanyń ata-anasy tabelge qol qoıady. Qazan aıynan bastap ArtSport platformasy bizge IP mekenjaıdy kórý múmkindigin berdi. Atalǵan múmkindik arqyly bir mezette 80-90 balanyń qol qoıǵanyn kórip otyrmyz. Ókinishke qaraı, bizde ol aqparattyń rastyǵyn tekseretin múmkindik joq. Degenmen jetkizýshi men balalardyń ata-anasynan sektsııaǵa baryp júrgeni týraly málimetti alyp otyrmyz», - deıdi ol.
Sondaı-aq Dene shynyqtyrý jáne sport basqarmasy basshysynyń mindetin atqarýshy baqylaý men qadaǵalaý máselesin júıeleý kerektigin aıtty.
