Astanada sport salasynyń úzdik mamandary marapattaldy
ASTANA. KAZINFORM — Astana qalasynyń Dene shynyqtyrý jáne sport basqarmasynda Qazaqstan Respýblıkasynyń Sport kúnine oraı saltanatty marapattaý rásimi ótti. Merekelik jıynda elorda sportynyń damýyna súbeli úles qosyp, salada uzaq jyldar boıy jemisti eńbek etip júrgen birqatar azamattyń eńbegi elend. Bul týraly elorda ákimdigi málim etti.
Saltanatty is-sharaǵa Astana qalasy ákiminiń orynbasary Erik Meırhan, qalalyq Dene shynyqtyrý jáne sport basqarmasynyń basshysy Vasılıı Levıt, «Qazaqstan sport ardagerleriniń odaǵy» respýblıkalyq qoǵamdyq birlestiginiń Astana qalasyndaǵy fılıalynyń basshysy Qýandyq Eljanov, sport ardagerleri, sport uıymdarynyń basshylary, jattyqtyrýshylar, ádiskerler men sala mamandary qatysty.
Jıynda sóz alǵan Astana qalasy ákiminiń orynbasary Erik Meıirhan sport qaýymdastyǵyn kásibı merekemen quttyqtap, elorda sportynyń búgingi jetistikteriniń artynda sportshylarmen birge olardy bıik belesterge jetelegen jattyqtyrýshylar men sala mamandarynyń qajyrly eńbegi turǵanyn atap ótti. Merekelik basqosýda dene shynyqtyrý men sport salasynyń damýyna eleýli úles qosqan azamattarǵa vedomstvolyq nagradalar tabystaldy. Atap aıtqanda, «Dene shynyqtyrý men sportty damytýǵa sińirgen eńbegi úshin» tósbelgisimen Astana qalasynyń gandbol sport klýbynyń dırektory Mıra Qalabaı jáne «Buqaralyq sport túrleri boıynsha sport klýbynyń» sporttyq baǵdarlaý boıynsha jattyqtyrýshy-oqytýshysy Galına Kornılova marapattaldy.
Al «Qurmetti sport qyzmetkeri» tósbelgisine qalalyq Olımpıadalyq rezerv daıarlaý ortalyǵynyń basshysy Danııar Tólegenov pen atalǵan ortalyq basshysynyń orynbasary Telman Begalıev ıe boldy. Sondaı-aq kásibı sheberligi, jaýapty qyzmeti jáne kóp jylǵy jemisti eńbegi úshin sport mektepteriniń jattyqtyrýshylary, sport uıymdarynyń basshylary, federatsııa ókilderi men sala mamandary Astana qalasy ákiminiń alǵys hattarymen marapattaldy.
Marapattardy qala ákiminiń orynbasary Erik Meıirhan tabystady. Saltanatty rásim Astana qalasy ákiminiń orynbasarynyń Alǵys hattaryn tabystaýmen jalǵasty. Marapattardy qalalyq Dene shynyqtyrý jáne sport basqarmasynyń basshysy Vasılıı Levıt tabys etti. Basqarma basshysy óz sózinde sport salasynyń ókilderin merekemen quttyqtap, árbir jeńis pen jetistiktiń artynda úlken eńbek pen kásibine degen adaldyq jatqanyn atap ótti.
Astana qalasy ákiminiń orynbasarynyń alǵys hatymen parasport, balalar men jasóspirimder sporty, buqaralyq sport, gımnastıka, trıatlon jáne basqa da baǵyttarda nátıjeli eńbek etip júrgen 11 maman marapattaldy.
Merekelik jıynda Qazaqstan Respýblıkasy Týrızm jáne sport mınıstriniń Qurmet gramotalary da óz ıelerine tabystaldy. Kásibı biliktiligi, sport salasyndaǵy tabysty qyzmeti jáne kóp jylǵy eńbegi úshin segiz maman vedomstvonyń Qurmet gramotasyna ıe boldy. Olardyń qatarynda sport uıymdarynyń basshylary, jattyqtyrýshylar, ádiskerler men sala qyzmetkerleri bar.
Saltanatty jıyn sońynda marapat ıelerine elorda sportynyń mereıin ústem etý jolyndaǵy eńbekteri úshin alǵys aıtylyp, jańa belester men jarqyn jeńister tilendi. Іs-shara estelik sýretke túsýmen qorytyndylandy.
Qazaq sporty reformalardan keıin qalaı ózgerdi? Kazinform tilshisiniń kúnine saraptama maqalasyn myna siltemeden oqyńyz.
