Astanada sport ardagerleriniń birinshi respýblıkalyq forýmy ótedi
ASTANA.KAZINFORM — 16-17 tamyz kúni, elordada Qazaqstan sport ardagerleri odaǵynyń qurylýyna oraı sport ardagerleriniń birinshi respýblıkalyq forýmy ótedi.
Bul týraly búgin «Qazaqstan» jeńil atletıkalyq sport kesheninde ótken baspasóz máslıhatynda belgili boldy.
Qazaqstandyq sport ardagerleri odaǵynyń tóraǵasy Elsııar Qanaǵatovtyń aıtýynsha, eki kúnge jalǵasatyn forým aıasynda konferantsııa jáne fılıal basshylary arasyndaǵy jıyn, sonymen qatar sport ardagerleri arasynda asyq atý, ústel tennısi, bılıard jáne shahmattan jarystar ótedi.
Elsııar Qanaǵatov óz sózinde odaqtyń bıylǵy jyly aqpan aıynda qurylǵanyn aıtty.
— Bir top ardagerler osy ıgi bastamany QR týrızm jáne sport mınıstrligine jetkizdik. Qortyndysynda, bastamamyz mınıstrlik tarapynan qoldaý taýyp, bıylǵy jyly aqpan aıynda qoǵamdyq birlestigimiz resmı tirkeýden ótti. Endi mine mınıstrliktiń fondynan qarjy bólinip, alǵashqy forýmdy uıymdastyryp jatyrmyz, — dedi sport ardagerleri odaǵynyń tóraǵasy.
Onyń aıtýynsha, bul odaqtyń qurylýynyń basty maqsaty sport ardagerleriniń biregeı eńbegin umytpaı, olardyń el sportyna qosqan ólsheýsiz ulesin dáripteý.
— Elimizdiń atyn halqaralyq arenada abyroımen qorǵaǵan ardager sportshy jáne jattyqtyrýshylardyń eńbegi umytylmaýy kerek. Sol sebepti, osy respýblıkalyq sport ardagerleri odaǵyn qurdyq, — dedi Elsııar Qanaǵatov.
QR sport ardagerleri odaǵy tóraǵasy atalǵan is-sharaǵa elimizdiń ár óńirinen 100-ge jýyq tanymal sport ardagerleri men jattyqtyrýshylar qatysatynyn jetkizdi.
Osyǵan deıin habarlaǵanymyzdaı, Astanada taekvondodan (WT) Kazakhstan Open 2025 halyqaralyq reıtıngilik týrnıri ótip jatyr.