Astanada SPA-salon ákimshisi 7 táýlikke qamaldy
NUR-SULTAN. QazAqparat – Elordada karantınge qaramastan jumysyn toqtatpaǵan SPA-salonnyń ákimshisi qamaýǵa alyndy, dep habarlaıdy QazAqparat tilshisi.
Polıtsııa departamentiniń qyzmetkerleri tótenshe jaǵdaı kezinde tártip buzý faktilerin anyqtaý boıynsha reıd barysynda denege massaj jasaý jáne ıntımdik qyzmetter usynatyn mekemeniń jumys istep turǵanyn anyqtady.
«Polıtsııa qyzmetkerleri kelgen kezde bógde adamdar úshin jabyq kottedj ishinde 11 adam bolǵan. Onyń segizi – ıntımdik qyzmet kórsetetin qyzdar. Bir ákimshi jáne eki klıent bolǵan. Qazirgi ýaqytta barlyǵy jaýapkershilikke tartyldy. Sot sheshimi boıynsha, atalǵan SPA-salonnyń ákimshisi 7 táýlikke, eki klıent 5 táýlikke qamaldy», - delingen Nur-Sultan qalasy Polıtsııa departamentiniń baspasóz habarlamasynda.
Massaj jasaıtyn qyzdarǵa 10 AEK kóleminde aıyppul salynǵan.
Málim etilgendeı, massaj jasaý qyzmetin kórsetetin salon áleýmettik jelilerde belsendi túrde jarnama jasaǵan.
«Polıtsııa departamenti karantın rejımi kezinde qala turǵyndaryna dalaǵa shyǵýǵa tyıym salynǵanyn eskertedi. Dalaǵa azyq-túlik, dári-dármek satyp alýǵa, medıtsınalyq qyzmetterdi alýǵa jáne qyzmetine ruqsat etilgen mekemelerge jumysqa baryp-kelýge ǵana ruqsat etilgen. Kámelettik jasqa tolmaǵan balalarǵa eresekterdiń ilesip júrýinsiz kóshege shyǵýǵa, bir otbasy múshesi bolmaǵan jaǵdaıda dalada úsh adamnan artyq jınalýǵa bolmaıdy», - dedi vedomstvodan.
